И мукьвара зун Республикадин офтальмологиядин больницадин  (РОБ) виниз тир технологийрин операцияр ийизвай отделенидиз акъатна. Сагърай и отделенидин заведующий, духтур Гизела Къазанфаровна!­ Кьезил гъил, устадвал ва алакьунар авай ада авур операция­ регьятдиз алатна. Гьиниз кили­гайтIани, «чилин циф» аквазвай вилиз экв хкана, заз цIийи дуьньядал акьалтай хьиз ава.

Гизеладихъ галаз хьайи суьгьбетдай чир хьайивал, ам духтурар тир Софиядин ва Къазанфаран хизанда 1970-йисуз Махачкъалада дидедиз хьана. 1987-йисуз ада ина 10-класс хъсан чирвилер аваз куьтягьна. Гьа и йисуз ам Дагмед­институтдик экечIна. 1993-йисуз Ги­зела Къазанфаровнади педиат­риядин факультет лап дерин чирвилер аваз куьтягьна. Ординатура акьалтIарайла, жегьил духтурдиз РОБ-да духтур-ординатор яз глаукомадин отделенида кIвалах гана.

Чирвилер мадни хкажун патал 1998-йисуз Москвада Гельм­гольцан тIварунихъ галай илимдинни ахтармишунрин­ институтда­ сифтегьан пешекарвиляй 4 вацран курсар кIелна. 1998-йисалай­ 2004-йисалди РОБ-да, неинк­и ви­чин хиве авай везифаяр­ намуслудаказ тамамарзава, гьакI кIва­­лахда 14 цIийивал тунва ва абурукай къенин юкъуз­ менфят къа­чузва­. 2006-йисуз Г.Та­гьи­­ровади Моск­ва­­да диссер­та­ция хвена, илимдин­ кандидат­ви­­лин тIвар къа­чуна. Ека­терин­бургда, Москва­да чирвилер хкаждай курсара кIел­на, Барселонада­, Амстердам­да меж­дународный­ кон­ференцийра ишти­ракна. КIва­лахра цIийи тех­ноло­гияр ишлемишзавай ада рес­­пуб­ликада сифте яз опе­ра­цийра­ «Алсан» (США) фирмадин цIийи тадаракрикай мен­фят къачунва. 2018-йисалай инихъ ам кIва­лахда ишлемишза­ва.

Гизела­ Къазанфа­ровнади Россиядин медицинадин журналра илимдин 15 кIвалах чапнава, вичин тежрибадикай телевиденидин­ каналрай передача­ярни гузва­, ам пешекар­вилин конференций­рал метлеб­лу докладар­ гваз экъечI­зава. Ам Дагъус­тан Рес­пуб­ликадин лайих­лу духтур, здра­­воохраненидин от­лич­ник я. 2020-йисуз, «Лап хъсан офтальмолог» яз гьисабна, адаз Дагъус­тан Республика­дин грант га­на.­ Коронавирусдин­ хаталу де­вирда­ РОБ-дин кьилин­ духтурдин замес­титель яз ада «Яру зонада» кефсузбуруз теш­кил­лувилинни­ куь­­ме­кар гунин кIва­лахар тухвана­. И кардай ам а вахтунда рес­пуб­­ли­кадиз регьбервал­ гайи В.А.­Ва­сильеванни, Махачкъаладин мэр С.К.Дадаеван чух­сагъул­дин чара­ралди, къиметлу­ пишкешралди къейдна. Ингье ихь­тин­ди я къенин девирда вилерин хъсан духтуррикай сад тир Гизела Къазанфаровна. Ада кьве аялни тербияламишзава.

Райсудин Набиев,

зегьметдин ветеран