Хуьруьн кимел ацукьна, агъсакъалри суьгьбетар ийиз, вахт кечирмишзавай. Садлагьана кIвачел акьалтна, Гьамида вичин кIеви дуст Селимаз лагьана:
— Яда, вуна гьикьван тупар яда? Бесрай! Вуна гафар хъсанбур ийизва, амма валай крар алакьзавач. Вун акьван викIегь итим тиртIа, вуна вахъ авай са хциз мехъер ийидай. Валай гьамани алакьзавач…
— Эй, бахтавар, — лагьана Селима, — вун квекай рахазва? Исятда авай жегьилриз чна авур мехъерар бегенмиш жезвани? Исятда абур чIехибур, чун гъвечIибур хьанва. Вавай абуруз гаф лугьуз жезвани? Ви балаяр агакьрай, вазни аквада. Ваз захъ пул авачирди хьиз авани? За мехъер ийин лагьайла, гадади хиве кьазвач. Арадилай халкьари зун беябурзава.
— Гадади акI хиве кьада хьи, эгер вун вилик экечIайтIа. Гадади заз мехъер ая лугьудач кьван.
— Акъваз, дуст, вуна тади къачумир, къе-пака ви балаярни агакьда. Ахпа килигда чун.
— Квез килигда? Абур гьакIан гафар я. Балаяр агакьнани — вахтунда мехъерар авуна кIанда, артух чIуру рекьера гьатдалди.
— Эй, — лагьана Селима, — ятIа ви рушни агакьнава, ша чун къавумар жен…
Гьамидан чинин рангар дегиш хьана.
— Зи руш? — лагьана Гьамида.
— Эхь-эхь, гьа ви руш. Ихтилат вегьейди вун я кьван.
— Я, хванахва, — лагьана къвалахъай Сабира. — Вун секин хьухь. Абур куьчейрал ийидай меслятар туш. Кьве дустунини, хъфена кIвале къуьн-къуьнуьз яна, са истикан чаяр хъваз-хъваз, ийидай меслятар я.
— Ихтилат зи дустуни вичи вегьейди я, — лагьана Селима. — Гила кьилизни акъудрай…
Гьамида, ихьтин ихтилат вилив хуьзвайда хьиз, гьасятда разивал гана: — Башуьсте, дуст! Ви гададиз тагудай руш… КIвалер-вахъ… Пулар — вахъ… Мад вуч кIанда?
— Айгьана вуна, зи пулуна вил аваз, ийизвай ихтилатар яз тахьуй гьа? — алава хъувуна Селима.
— Тафават авач. Руш — ваз, пул — заз, — жаваб гана Гьамида.
— Гьикьван кIанда ваз?
— Гьикьван гзаф хьайитIа, гьакьван…
Са кьве югъ алатна, Селим вичин къарини, гадани галаз Гьамидан кIвализ мугьман жеда. Дем – суьгьбетар авурдалай кьулухъ абуру мехъерин ихтилат кудда.
— Чун иниз атунин себеб квез чизвайди я. Чахъ гада ава, квехъ-руш… Чаз къавумар жез кIанзава, Аллагьдин куьмекдалди. Куьне вуч лугьузва?
— Чун рази я, — гьарай акъатна Гьамидай.
— Вуч рази я? Вуч рази я? Вун рази хьуналди вири кIвалахар туькIуьзвани?.. Рушни рази хьана кIандачни? — къарагъна Гьамидан къари къулавай.
— Чун рази хьайила рушни рази жеда ман…
И ван галукьай рушай гьарай акъатна:
— Мехъерар вучтинбур я? Зун гъуьлуьз гудай вахт хьанвани? Квехъ вуч хьанва? Зун мал яни маса гузвай?..
Гьамид гзаф алахъна, руш алакьариз, амма адан писпиди ван авунач.
— Эгера, буба, вуна зун маса гузватIа, зун кIвалерай катда. Ваз руш амач лагьайтIа жеда. Гзаф гуж гъалиб ийиз хьайитIа…
— Ваъ-ваъ, чан руш! Абур вуч ихтилатар я? Захъ маса гудай рушар авани?.. Вун секин хьухь, чан бала. Дидедал чан аламай кьван вун такIан садазни гудайди туш, — секинарзава дидеди руш.
— За ваз вуч лагьанай, дуст Гьамид? Гила гьикI я? Гила вучиз кьил къванцик акатнава? Эркекда хьиз жавабни це, кьил чиле твамир. Вуна зи тIварни кьацIурна, захъ галаз ви тIварни.
— Багъишламиш, дуст, тахсирлу я. Мад сеферда багъишламиш… Гила и кар зазни тарс хьана. Балаяр хвейи диде-бубаяр валарай тIуз… Кьегьалар — кIамарай тIуз хьанва…
Гьамид, Селиман жибиндиз килигиз, кьве вил экъисна амай.
— Эхь, эхь, дуст. Заз ви шейтIанвал чир хьана. Вун жегьилрин къайгъуда ваъ, зи пулуна вил авай шейтIан я…
Ражадуллагь Салманов
