Хуьруьнвийриз Салигь мискьи кас тирди малум­ тир. ЯтIани, адан хайи югъ тирди чизвай къуни-къун­ши­яр, са 5-6 итим, нянрихъай адан кIвализ фе­на. Салигьа сала гьер алаждайлани абуруз акунвай…

Ацукьнава итимар суфрадихъ. Къулал лапагдин як квай шур­пани ргазва.

— Куьн зи кIвализ гьар кткана акъатдайбур туш, гада­яр, гьакI хьа­йи­ла, хуьрекни куь вилик за гъи­да, — ла­­гьана, Салигьа хуьрек къапара тваз башламишна. Гьар къапуниз гъвечIи са-са кIус як вегьена­, Салигьа шурпадин къапар мугьманрин вилик эцигиз башламишна.

— ГьикI хьана, къунши, вуна лапагдин як катулдик тIимил кутунвайни, къапариз кьенятдивди вегьезва хьи? — гадайривай кисна акъвазиз хьанач.

— Ваъ, дуст ксар, тIимил вуч­тин­­­ди я, атай кас-масни жеда лагьана, вири лапаг, кIусар-кIусар аву­на­, катулдик кутунвайди я, — ви­­чиз къайгъу авачирдай кьуна, жаваб гана Салигьа. — Кар ана ава хьи, ла­паг куькди я, югъ лагьайтIа — чимиди. Чими юкъуз лапагдин куьк як гзаф тIуьрла бедендиз гьекь акъат­дайди я. Герек яни гьа кар квез?

— Дуст кас Салигь, гьекь акъатунихъай кичIез­ватIа, жу­ван къапу­низ гьа гъвечIи кIусни вегьемир, — ай­гьам­дивди лагьана Муртуза. — Чаз кIиче туш. Югъ нянихъ эл­къвен­­­ва, са 4-5 сятина кьванни ина ацукь тавуна, чун хъфейтIа, вун бейкеф жедайдини чаз чизва. Чак тади квач…

Салигьаз, катулда авай як са куруниз акъудна, мугь­манрин вилик гъунилай гъейри, маса чара амукь­­­нач. Адаз гила, дугъриданни, гьекь акъатнавай­­.

Хазран Кьасумов