ЦIийи ктабар

Мукьвара «ЦIийи Кавказ» дестеди культу­радин «Куьредин ярар» центрадихъ галаз санал Эминхуьряй тир Россиядин журналистрин ва лезги писателрин союзрин член Хазран Кьасумован «Вил вегьена килигайла…» тIвар алай шииррин цIийи ктаб чапдай акъудна. Адаз редакторвал­ авур машгьур писатель, журналист ва таржумачи Гьажи Ильясова «Сифте гафуна» кхьизвайвал, цIийи ктабда авторди дуьнь­ядиз вил вегьена килигайла, вичиз акур крарикай, инсанрикай, абурун амалрикай, къилихрикай кхьенвай шиирар гьатнава.

Ктаб «ХупI ярашугъ я» шиирдилай башламиш жезва­. Авторди кьейдзавайвал, и шиир ада Е.Эминан «Квез вуч ярашугъ я» шиир кIелайла кхьейди я. 27 бендиникай ибарат шиир ихьтин цIараралди куьтягь жезва:

Шейиниз къимет,

Хъсан кардиз дикъет,

Хазраназ газет

ХупI ярашугъ я.

Дагъустандин халкьарин садвилин йикъаз («Садвал герек я»), «Лезги газетдин» 100 йисан юбилейдиз («Мубаракрай ваз юбилей»), «Куьредин ярар» культурадин центрадин 30 йис тамам хьуниз («Куьредин ярариз») ва Агъа СтIалдал гьар йисуз 18-майдиз тухузвай СтIал Сулейманан Шииратдин йикъаз («Шииратдин сувар») бахшна кхьенвай шиирарни метлеблубур хьанвайди къейд ийиз кIанзава.

Журналист, писатель ва шаир Хазран Кьа­су­мо­ван яратмишунра кьилин чка сатирадин ва юмордин эсерри кьазва. «Вил вегьена килигайла…» ктабдани юмордин шиирар гзаф ава. ИкI, «бязибурун нукьсанар» паюна кьве цIа­рара (ктабда къуша 25 цIар гьатнава) авторди «фитне ийиз къекъвезвайбур», «кар алакьдай, алакьунар авай дустарал пехилбур», «чуьруьк ийиз, идал-адал элкъведайбур»­, «кьве чин алаз рахадайбур», «пул хьайи­ла, чеб вине кьадайбур»… негьзава, абу­руз дуьз рекьел эхкъечIуниз эвер гузва.

Сатирадин ва юмордин эсеррикай яз, чавай цIийи ктабда гьатнавай «Я дус­тар…», «Же­­дай туш», «Аламатдин дуьнья я им», «Гьа фитнеди бахтсузвилел гъана вун», «Туьтуькъуш» шииррин тIварарни кьаз жеда. И эсерра Х.Кьасумова са бязи инсанриз чпик квай чIуру амалар, хесетар къалурзава, гьар са касдиз вичиз «масадан вилерай килигдай» мумкинвал гузва.

Ктабда гьатнавай «Виридалай хъсан кар я инсанвал» шиирни насигьатдинди хьанва. Ана ихьтин бендер ава:

Гафар гьалчиз, тегьне ямир масадаз,

Акси фимир жегьил чIавуз вун къадаз.

Кьуьзуь хьайла, къалумда и крар ваз,

Виридалай хъсан кар я инсанвал.

 

ЧIуру рекье уьмуьр тухун къелет я,

Инсан кьена, тIвар амукьун адет я.

Лугьун тавуй, вун кьейила, «небгет» я,

Виридалай хъсан кар я инсанвал.

«Вил вегьена килигайла…» Х.Кьасу­мован 8-ктаб я. Чна чи къелемдин стхадиз, кIвалахдин юлдашдиз­ цIийи ктаб акъатун муба­ракзава, адахъ мягькем сагъламвал, яратмишунрин рекье мадни еке агалкьунар хьана кIанзава.

Асият  Мирзалиева,

РФ-дин журналистрин Союздин член