Ассалам алейкум, играми стхаярни вахар!

Квез виридаз рамазандин варз мубаракрай! Къуй куьне и вацра хуьдай сивер, гудай садакьаяр, ийидай вири ибадатар Аллагьди кьабулрай. Амин!

Рамазандин варз

Атана вун берекат гваз
Уьмметдиз вири.
Кьабулна вун гьерекат кваз
РикIери чими.

Йиса садра къведай мугьман
Я вун гьакьван хуш!
АцIурзавай мергьяматдив
Руьгьер хьанвай буш.

Ибадатра мусурманар
Тахьурай зайиф.
Чна гьакьван вилив хуьзва
Ляйлятуль-къадр йиф.

Сивер хуьз, гьакI кпIар ийиз
Хьурай чаз регьят.
Чун паталди и пак вацран
ЧIехи я менфят.

Шукур хьурай Сад Аллагьдиз
Чаз и бахт гайи.
Чи гьар садан ибадатар
Кьабулрай вири!

«Лезги газетдин» редакциядин коллектив