Ахцегь райондин Фиярин хуьряй тир жегьил аскер Мегьарамов Сегьерхан Сергьетовича Украинада кьиле физвай махсус операцияда (СВО) сифте йикъалай иштиракзава. Волноваха, Попасное шегьерар миллетчийрикай азад хъувунин къати женгера къалурай викIегьвилерай дагъви тупчи (артиллерист) РФ-дин оборонадин министерстводин къарардалди, “За боевые отличия” медалдиз лайихлу хьанва. Алай вахтунда кьегьал дагъви, женгинин хер сагъар хъийиз, Ростовдин госпиталда ава.
“Духтурар гзаф сагърай, абуру зун вахтунда кIвачел ахкьалдарзава. Хире вичикай саки хабар хгузвач. Са тIимил ял яна, дустарин патав фронтдиз хъфида. “Кар тавунмаз, душман текьенмаз алатдач” лугьудай хъсан мисал ава. НАТО-дин уьлквейрин футфадик кваз пайда хьанвай пехъи душман анжах чи умуми къуватралди тергиз жеда. Гьавиляй гъиле-кIваче звар, къене рикI-руьгь авай викIегь гадайриз за Ватан хуьзвайбурун жергейриз, яни чи куьмекдиз атун теклифзава”, — лугьузва ада телефондай.
Чи мурад сад я: къуй, я Аллагь, дяве фад ва гъалибвилелди куьтягь хьана, чи рухваяр хуруйрал орденарни медалар алаз сагъ-саламатдиз хтурай. Амин!
Д. Шерифалиев
