Къведай йисан эвел кьилера Махачкъалада
ансамбль патал “Кьуьлерин кIвал” кардик акатда
1-ноябрдиз Дагъустандин Кьил Сергей Меликова “Лезгинка” ансамблдин коллективдихъ галаз гуьруьш кьиле тухвана. Къейд ийин хьи, 1958-йисуз арадал гъайи и ансамблди Урусатдин, Кавказдин, Дагъустандин 100-лай виниз халкьарин кьуьлерал “чан гъана”. И йисара ансамблдин коллективди дуьньядин 70 уьлкведа кьиле фейи фестивалра иштиракна, абурукай 48 мярекатда гъалибвилер къазанмишна.
Коллективдихъ галаз кьиле фейи гуьруьшдал Сергей Меликова Махачкъалада “Лезгинка” ансамбль патал “Кьуьлерин кIвал” эцигзавайди рикIел хкана. “Чи къведай гуьруьш куь кIвале кьиле фидайдак за еке умудар кутазва. Чна вирида цIийи кIвал вилив хуьзва”, — къейдна региондин Кьили. Адан гафарай малум хьайивал, “Кьуьлерин кIвал” 2023-йисан эвел кьилера ишлемишиз вахкудайвал я.
ГьакIни Сергей Меликова “Лезгинка” ансамблдин коллективдиз Донбассда са шумуд концерт гунай сагърай лагьана. РикIел хкин, артистри Урусатдин армияда къуллугъзавайбуруз яргъалди рикIел аламукьдай концертар къалурна, Луганскдин, Донецкдин агьалийрихъ, ина дяведин рекьяй къуллугъзавайбурухъ галаз гуьруьшар кьиле тухвана.
Къейд ийин хьи, “Лезгинка” ансамбль идалай виликни дяведин гьерекатар кьиле физвай чкайриз мугьман хьанай.
Гуьруьшдин сергьятра аваз Сергей Меликова ансамблдин балетмейстер-постановщик Нелли Мусаевадив “Дагъустан Республикадин вилик лайихлувилерай” орден вахкана. Ансамблда кIвалахзавай йисара ада артистар патал сад масадалай хъсан тир 98 постановка гьазурна.
Эхирдай “Государственный Академический заслуженный ансамбль танца Дагестана “Лезгинка” ГБУ-дин генеральный директор Жамбулат Мегьамедова коллективдиз мугьман хьунай республикадин Кьилиз сагърай лагьана.
Чи мухбир
