24-мартдиз Белиж поселокда Советрин Союздин Игит Абас Исрафилов рикIел хкуниз талукьарна турнир кьиле фена. Адан кьилин макьсад игитдин чешнедалди жегьил несил ватандал, жуван халкьдал, хайи чилел рикI алаз тербияламишун тир. Ана Кьурагь, Докъузпара, Хив, Дербент районрин, Дербент шегьердин ва Белиж поселокдин хкянавай командайри иштиракна.

Турнир ачухуниз талукьарнавай мярекатдал Белиж поселокдин кьил Р.Гьабибулаев ва волейболдай Россиядин чемпион Р.Рамазанов рахана. Абуру къейд авурвал, Россияди Украинада махсус серенжем кьиле тухузвай алай вахтунда, чи игитар ри­кIел хкуналди, ихьтин турнирар ва маса се­ренжемар тухунихъ акьалтзавай несил патал еке метлеб ава. А.Исрафилова Афгъанистанда хьиз, Н.Гьажимурадова Украинада еке игитвал къалурна.

— Чун чи Ватандиз вафалу веледар я. Квехъ, спортда хьиз, уьмуьрдин вири рекьерани анжах агалкьунар хьурай! — алхишна мярекатдал рахайбуру.

Турнирдин финалдиз Кьурагьрин ва Белиж поселокдин командаяр акъатна. “Кьурагь” команда (шикилда) 1-чкадиз ла­йихлу хьана. “Белиж” ва “Дербент” ко­ман­дайри, талукь тирвал, 2 ва 3-чкаяр кьуна.­

Турнирдин судьявилин везифаяр Заур Велиханова тамамарна. Акъажунра кIвен­кIвечи чкаяр кьур командайриз кубокар, медалар, грамотаяр, футболкаяр, гьакlни 30, 20, 10 агъзур манат премиярни гана.

Спортдин мярекат тешкилиз куьмек гайи тренер Закир Идрисован гафаралди, акъажунрин вири харжияр карчи Азим Исмаилова вичел къачунвай. Поселокдин администрацияди Белижда кьиле тухузвай кlвалахрик къуьн кутунай ва культурно-массовый мярекатра иштиракунай Азим Исмаиловаз сагърай лагьана.

РикIел хкин: са шумуд югъ идалай вилик Белиж поселокдин гимназиядин спортзалда Кьиблепатан Дагъустандин командайрин арада волейболдай ачух турнирни кьиле тухвана. Ам жегьилрин арада массовый спорт вилик тухвай, Белиж поселокдин администрациядин кьилин къуллугъдал кIвалахай Юсуф Азизович Азизован экуь къаматдиз бахшнавай. Турнирда Дербент райондин Хазардин, Лукlарин, Белиждин, Мамедкъаладин, Кьурагь ва Стlал Сулейманан районрин спортшколайрин хкянавай командайри иштиракна.

Ам ачухуниз талукь мярекатда Белиж поселокдин кьил Рамиз Гьабибулаева, Да­гъустан Республикадин физический культурадин ва спортдин министр Сажид Сажи­дова, райондин ва поселокдин собранийрин депутатри, школайрин директорри, общественный тешкилатрин векилри, Юсуф Азизован багърийри ва масабуру иштиракна. Судьявилин везифаяр Закир Идрисова ва Тельман Загьирбегова тамамарна.

Къизгъин къугъунрин нетижада “Белиж” поселокдин командади (шикилда)1-чка кьуна. 2 ва 3-чкаяр, талукь тирвал, “Ма­мед­къала” ва “Кьасумхуьр” командайри пайна.

Къагьриман Ибрагьимов