Виликдай Ахцегь район залан атлетикадай Абдулгьамид ва Мирза Къеземетоври, Сабир Шагьэмирова, Гьажибег Гьажибегова, Фиридин Эюбова ва масабуру машгьурнай. Абурун баркаллу рехъ жегьил пагьливанрин цIийи несилди лайихлудаказ давамарзава. ИкI, спортдин ветеран, залан атлетикадай РФ-дин спортдин мастер Халил Мирзоеван ва адан хва, А.Гъаниеван тIварунихъ галай ДЮСШ-дин муаллим Фаргьад Мирзоеван гъилик спортдин и жуьредай вердишвилер къачузвай спортсменрин нетижайри и кар субутзава…
26-мартдиз Бабаюртда залан атлетикадай кьиле фейи Дагъустандин чемпионатда Ахцегьрин хкянавай командадин иштиракчийри, чпин руьгьдин ва бедендин къуват къалуруналди, кIвенкIвечи чкаяр кьуна. ИкI, Асали Абдулгьашумов (73 кг-дин заланвал авайбурун арада) 225 кг (рывок — 115, толчок — 140 кг), Рагьман Лалаев (89 кг-дин заланвал авайбурун арада) 275 кг (рывок — 125, толчок — 150 кг) кг хкажуналди, 1-чкайриз лайихлу хьана. Бахтияр Эмирова (81 кг-дин заланвал авайбурун арада), 220 кг (рывок — 100, толчок — 120 кг.) хкажуналди, 2-чка кьуна.
Ихьтин агалкьун чи пагьливанрихъ мукьвал йисара хьанвачир. Вилик квай СКФO-дин чемпионатдани чаз абурухъ еке агалкьунар хьана кIанзава.
Дашдемир Шерифалиев
