СтIал Сулейманан районда мини-футболдай школадин лигадин чемпионат кьиле физва. Ана 16 командади иштиракзава. 14-октябрдиз башламиш хьайи чемпионат ноябрдин эхирра куьтягь жеда. Гьар са къугъун 10 декьикьадин 2 таймдикай ибарат я.
Командаяр кьве зонадиз пайнава: А ва Б зонайра гьар сана 8 команда ава. Гъалибчи ва приздин чкаяр кьур командаяр 3-тур акьалтI хьайила тайин жеда.
Командайрин арада къугъунар ФИФА-ди тестикьарнавай международный стандартрихъ галаз кьадайвал кьиле физва.
Чемпионатда “Ашага-Стал”, “Новo-Мака”, “Касумкент”, “Даркуш-Казмаляр”, “Герейханово-2”, “Эминхюр”, “Ичин/Цмур”, “Кварчаг”, “Юхари-Стал”, “Новый поселок”, “Герейханово-1”, “Ашага-Стал-Казмаляр”, “Саидкент/Алкадар”, “Орта-Стал”, “Куркент”, “Испик” командаяр къугъвазва.
И йикъара школадин лигадин чемпионатда къугъвазвай жаван футболистрихъ галаз муниципальный райондин кьил Нариман Абдулмуталибов гуьруьшмиш хьана. “Ново-Мака” — “Куркент” ва “Орта-Стал” — “Ашага-Стал-Казмаляр” командайрин къугъунриз килигайдалай гуьгъуьниз Н. Абдулмуталибова жаван футболистрин алакьунризни устадвилиз еке къимет гана, чемпионат тешкилунай райондин спортдин, туризмдин ва жегьилрин крарай Комитетдиз ва 1-нумрадин ДЮСШ-дин тренерриз-преподавателриз сагърай лагьана.
Къейд ийиз кIанзава хьи, чемпионатдин гъалибчидиз ва приздин чкаяр кьур командайриз грамотаяр, кубокар, медалар ва пулдин призар гуда.
Идалайни гъейри, чемпионатда лап хъсан къугъвайбур (гьужумдайди, вратарь, защитник, полузащитник ва лап хъсан къугъвайди) тайинарда, абурузни пишкешар гуда.
Хазран Кьасумов
