Саки 200 хизанди
Дидевилин капиталдин такьатар неинки са яшайишдин шартIар хъсанарунин ва я маса месэлаяр гьялунин рекье, гьакIни аялриз образование къачудай мумкинвал гунин кардани харж ийиз жезва. Алай йисуз дидевилин капиталдин такьатар и кардиз харж авур хизанрин кьадар Дагъустанда 198-дав агакьнава.
РД-дин Пенсийрин фондуни хабар гузвайвал, капиталдин такьатар и рекье аялдин пуд йис тамам хьайидалай кьулухъ харж ийиз жеда. Тек са дуьшуьш квачиз: такьатар аялрин бахчада бицIекдихъ гелкъуьн патал ишлемишзаватIа.
Къейд ийин хьи, 2021-йисан 1-январдилай сад лагьай аял хьайила гузвай дидевилин капиталдин кьадар 483 агъзурни 881 манатдиз барабар я.
Къалп малумат
Эхиримжи йикъара интернетдин жуьреба-жуьре сайтра, гуя мектебда кIелзавай аялриз кьвед лагьай сеферда 10 агъзур манатдин кьадарда аваз пулдин пособияр гузва лугьуз, малуматар пайда хьанва. И месэладай кьил акъудун патал чна Дагъустандин Пенсийрин фондунин пресс-къуллугъдивай баянар гун тIалабна.
Якъин хьайивал, и малумат гьакъикъатдихъ галаз кьазвайди туш. ЧIехи пай хизанрив ихтилат физвай пособие гьеле алай йисан августдин вацра агакьна. Пул къачун тавурбуру 2021-йисан 1-ноябрдалди арза кхьин лазим тир.
Республикадин Пенсийрин фондунин пресс-къуллугъдин векилди алава хъувурвал, государстводи яшайишдин рекьяй куьмек гун патал агьалийриз чара ийизвай вири пособийрикай ва маса къуллугърикай гьакъикъи малуматар фондунин сайтда ва социальный сетра авай официальный аккаунтра чапзава.
Ветеранриз муштулух
РФ-дин Президентдин Указдал асаслу яз, “За оборону Ленинграда” медаль, “Жителю блокадного Ленинграда” лишан авай ветеранриз ноябрдин вацра 50 агъзур манатдин кьадарда аваз пулдин пособияр чара ийида.
РД-дин Пенсийрин фондуни хабар гузвайвал, Дагъустанда ихьтин шабагьар авай 5 ветеран яшамиш жезва.
Къейд ийин хьи, пособияр улакьрин “Уьмуьрдин рехъ” магистраль ахъаяйдалай инихъ 80 йис тамам хьунихъ галаз алакъалу яз гузва. Ватандин ЧIехи дяведин йисара и рекьи душманди гьалкъада тунвай Ленинград уьлкведихъ галаз алакъалу ийизвай.
«Лезги газет»
