Ватандин ЧIехи дяведин иштиракчи Асул Къадирович Сейфуллаеван тIвар са шумуд сеферда военный корреспондентри чпин макъалайра викIегь танкист яз кьунва.
Асул Сейфуллаев Кьасумхуьруьн райондин Макьарин хуьре 1917-йисуз дидедиз хьана. 1936-йисуз адаз Яру Армиядин жергейриз эверна. Кьуд йисуз къуллугъ авурдалай гуьгъуьниз ам армияда акъвазна. Дяве башламишайла, ам Молдавия ССР-дин Бельцы шегьерда ротадин старшина тир. 1942-йисуз адал залан хер хьана. Госпиталдай ахъайдайла, Асул Къадировича тIалабна вич танкарин частуниз ракъурун. Залан хер жедалди ам артиллерист тир.
Асул Къадирович танкарин 5-армиядин 18-корпусда мотострелковый кьилдин ротадин командирвиле тайинарна. Дяве куьтягь жедайла, адаз майордин чин авай.
Лезги офицер Асул Сейфуллаеваз гьукуматди са шумуд орден ва медаль гана. Абурун арада Ватандин дяведин I-II дережайрин, Александр Невскийдин, Яру Пайдах, Яру Гъед орденар авай. Асул Къадировичаз Советрин Союздин Игит лагьай тIвар гун патал Москвадиз документар ракъурнай, амма, вучиз ятIани, ганачир.
Дяве куьтягь хьайила, Асул Сейфуллаев хайи хуьруьз хтана. Ахпа Туркменистандиз фена. Адаз чIехи хизан авай: вад хвани кьве руш. Туркменистанда хъсандиз зегьмет чIугуна, гьуьрмет къазанмишна. Адав президент Сапармурад Ниязован патай багьа пишкешар, шабагьар агакьна. СССР чкIайла, Асул Къадирович хайи ватандиз хтана, ина ам рагьметдиз фена.
Масуб Магьмудов
