Багълари кьунвай майданрал гьалтайла, СтIал Сулейманан район республикада вилик жергейра авай муниципалитетрик акатзава. Районда багъларин майданар йисалай-суз артухарзава. ИкI, цIи райондин карханайри ва кьилдин ксари-арендаторри 556 гектарда цIийи багълар кутуна.

Районда багъманчивилин хиле кьилдин ксарини бегьерлувилелди кIвалахзава. Ихьтинбурукай яз, ­райондин хуьруьн майишатдин ва суьрсетдин управленидин начальникдин заместитель Гьамидин Абдулкъафарова Эминхуьряй тир арендатор Тажир Батманован тIвар кьуна.

— Тажир Абдурагьманович кIел тавунвай агроном я лагьайтIа, бажагьат зун ягъалмиш жеда, — лагьа­на Гь.Абдулкъафарова. — Ада вичин­ кIвачихъ галай багълара агротехникадин гьар са серенжем галай-галайвал ва вахт-вахтунда кьи­ле тухузва. Идан нетижа яз, арен­да­торди гьар йисуз багъларай емишрин бул бегьерни кIватI хъийизва.

Чун Т.Батманован багъдиз фе­на. Ана михьивал, хъсан къайда ава. Цуьк ахъайнавай, хъсан гелкъуьн тешкилнавай багъ акурла, гуьгьуьл ачух жезва.

Т.Батманован кIвачихъ 8 гектар ичин багъ гала. Тарарин кьурай ва герек авачир хилер атIанва, абурун пунариз пер янава. Чун фейила, арендатор багъдиз гатфарин ятар гунал машгъул тир.

Тажирахъ “Белорусь” трактор, адахъ акалдай хуьруьн майишатдин алатарни ава. Ида тежрибалу арендатордиз багълариз азаррин ва зиянкар гьашаратрин аксина дарманар ягъунин, тарарин арайра чил пурпу авунин, емишар дашмиш хъувунин ва маса кIвалахар вичин къуватралди кьиле тухудай мумкинвал гузва.

Багъдин кьилихъ Т.Батманова емишар хуьдай чкани эцигнава. Анай арендаторди ичер муьштерийриз кура-кура маса гузва. Экологиядин жигьетдай михьи, хъсан еридин ичериз гьар йисуз муьштериярни ава.

Багъдин къерехда гъвечIи-гъвечIи участокра багъманчиди картуфар, помидорар, афнияр, чичIекар ва маса няметарни битмишарзава.

Ваз къуватар хьурай, халкьдин суфра берекатлу ийизвай багъ­манчи!

Хазран Кьасумов