Казначей. Пачагьдин хазина хуьзвайди, къизилдин пул авай чувалрин кьилел алайди — и гафунин ван атайла, зи фикирдиз анжах ихьтин, хкетрик квай хьтин касдин суьрет къвезва. Эхь, хазина хуьзвай инсанриз дегь девиррилай “казначей” лугьузва. Амма алай аямдин казначейриз пул гьич аквазвайди туш, абуру анжах документрихъ галаз кIвалахзава.
Федеральный казначействодин управленидин Дагъустанда авай 2-нумрадин отделдин начальникдин заместитель Тамара Шамиловна Хинабиевади вичикай зарафат кваз лугьуда: “Казначей — им пуларикай гзаф чидай, амма вичиз пул тIимил авай кас я”. Ада казначействода къуллугъиз саки 20 йис я, абурукай 10 йис — руководителдин заместитель яз.
Тамара Хинабиева Мегьарамдхуьруьн райондин Советский хуьре бурши макьарви, Ватандин ЧIехи дяведин ветеран, вичин вахтунда еке жавабдар къуллугърал хьайи Кьиблепатан Дагъустандин машгьур эцигунардайди, “Зи Ватан-Бурши Макьар” ктабдин автор, еке гьуьрметдиз лайихлу хьайи рагьметлу Шамил Абдулхаликьован чIехи хизанда вад лагьай велед яз дидедиз хьана.
Тамара ваха гьеле школада кIелзамаз, ученикрин бригадада аваз, хуьруьн совхозда зегьмет чIугваз башламишна. Хуьре юкьван школа акьалтIарай руш 1978-йисуз Дагъустандин хуьруьн майишатдин институтдин экономикадин факультетдик кIелиз экечIна. Вузда кIелзавай эхиримжи йисуз ам кьисметди Дербент райондин Чинар хуьруьз акъудна. Институт лап хъсан къиметралди акьалтIарай ада зегьметдин рехъ Чинар хуьре “Дагъустандин 50 йис” тIвар алай совхозда учетчицавилелай башламишна, и хуьруьн администрациядин кьилин бухгалтервилин везифайрал кьван агакьна. Алакьунар авай хъсан пешекар хьуниз килигна, 2000-йисуз адаз Дагъустандин кьиблепатан районрин Федеральный казначействодин учет ва отчетностдин отделдин кьилин казначейвиле кIвалах теклифзава. 2010-йисалай къенин йикъалди Тамара Шимиловнади Россиядин Федеральный казначействодин управленидин Дагъустанда авай 2-нумрадин отделдин начальникдин заместитель яз къуллугъзава. Яргъалди ва дурумлудаказ и пешедал кIвалахиз адаз вичин сабурлувили, гьи месэла хьайитIани дериндай кьатIунин къилихди куьмек гузва.
Лугьудайвал, пулуниз гьакIан алакъа ваъ, гьисаб кIанда.
“Зи фикирдалди,- лугьузва Тамара Шамиловнади,- казначейство — бюджетдин къуллугъдин карда важиблу орган я. Исятда чун сад тир хазинадин гьисабдал элячIнава. Бюджетдиз къвезвай кьван дахут, гьакIни жезвай харжияр — вири сад тир гьисабда кьазва. И карди вири пуларин-такьатрин юзун са юкъуз чириз куьмекзава”.
Т.Шамиловнадивай вичин кIвалахдикай яргъалди суьгьбетиз жеда. Амма и кеспидикай тайин чирвал авачир касдиз пешедин сирерай кьил акъудиз, гьакъикъатдин гъавурда гьатиз пара четин я. Анжах са кардин гъавурда гьасятда акьазва: казначей — гзаф четин, вичи неинки са къайдайринни къанунрин, гьакIни алай девирдин уьмуьрда кьиле физвай кьенятчивилин гьерекатрин дерин чирвилер истемишзавай асаслу, гьа са вахтунда итижлу кIвалахни я.
Ада вичихъ авай тежриба казначействодин жегьил работникрихъ галаз хушвилелди пайзава. Идалайни башкъа, ада карханайрин, идарайрин работникризни кIвалах къайдада аваз вилик тухудай рекьер къалурзава.
АкьалтIай хъсан къилих, виниз тир пешекарвал, яргъал йисара кIвалахнавай гьакъисагъ зегьмет себеб яз, адаз казначействодин управленидин ва карханайрин къуллугъчийрин арада чIехи гьуьрмет ва къимет ава. И гафарин гьахълувал адаз ганвай чухсагъулдин чарари, Гьуьрметдин грамотайрини тестикьарзава.
Тамара Шамиловна чи милли музыкадал, шииратдал, кьуьлерал рикI алай, дагъларин такабурлувилел ва Каспий гьуьлуьн гуьзелвилел кьару инсан я.
Лугьун лазим я хьи, ам неинки жавабдар ва гьакъисагъ пешекар, эвелни-эвел ам дуьз ва къени тербия гана, кьве велед чIехи авунвай хизандин кайвани, гзаф хъсан ва кIани дидени я. Адан уьмуьрдин юлдаш Рагьман Шабанович Дербент шегьердин “ЕИРЦ” МУП-дин абонентрин отделдин начальник я. Адан рушахъ вичин хизан, кьве аял ава. Гададини экономикадин рехъ хкянава. Эвленмиш хьанва, пуд аялдиз тербия гузва.
И мукьвара Тамара Шамиловнади шад гьалара вичин юбилей къейдна. Чнани адаз мад сеферда и югъ рикIин сидкьидай тебрикзава, Аллагьдивай адаз вичин уьмуьрда ва кIвалахда мадни зурба агалкьунар хьун, сагъвал ва веледрикай гьамиша рикI динж хьун тIалабзава.
Къагьриман Ибрагьимов
