Алай йисан 29-октябрдиз Росгвардиядин ведомстводинди тушир охранадин Управление арадал атана 70 йис тамам жезва. Суварин вилик Махачкъалада, «Дагъустан» РИА-дин конференц-залда, журналистрихъ галаз кьиле фейи гуьруьшдал Управленидин начальникдин заместитель, полициядин полковник Омар Нурбагандова алатнавай йисара кIватIнавай тежрибадикай, гьар йикъан везифайрикай ва кьилиз акъудзавай кIвалахдикай куьрелди лагьана.
— 1952-йисуз, СССР-дин Министррин Советдин къарардалди, МВД-дин къурулушдин патав тешкилай ВНСО (вневедомственная наружная сторожевая охрана) къуллугъдин везифайрик майишатдин объектар хуьн акатзавай. Алатнавай йисара чи къуллугъда еке дегишвилер арадал атана. Къенин юкъуз важиблу объектар, жемиятдин къайдаяр хуьнихъ галаз сад хьиз, чи къуллугъдин хиве, Россиядин Федерациядин Президентдин къарардалди, уьлкведин субъектрин жавабдар къуллугърал алай ксар хуьнни акатзава. ИкI, алай вахтунда чи подразделенидин къуллугъчийри республикада, санлай къачурла, 3500-лай виниз агьалийрин объектар ва квартираяр хуьзва, и рекъемни йисалай-суз артух жезва. Абурун арада ТЕК-дин (топливно-энергетический комплексдин) объектар ва чирвилер гудай идараяр виридалайни гзаф ава, — къейдна ада.
Омар Нурбагандова Управленидин къуллугъчийри кьилиз акъудзавай женгинин кIвалахдин нетижаярни кьуна. ИкI, кьилин везифадилай — хуьзвай объектра ва агьалийрин хсуси кIвалера чуьнуьхунар арадал атуниз рехъ тагунилай гъейри, ведомстводинбур тушир охранадин къуллугъчийри, тахсиркарвилерин вилик пад кьуниз талукьарна, республикадин МВД-ди кьиле тухузвай серенжемрани иштиракзава, идалди тахсиркарвилер дуьздал акъудуник чпин лайихлу пайни кутазва. Кьилди къачуртIа, 2022-йисан алатнавай 9 вацра абуру административный къайдаяр чIуруниз талукь 300-далай виниз тахсиркарвилер дуьздал акъудна.
Омар Нурбагандова къуллугъчийри чпин везифаяр баркалла алаз, чандилайни гъил къачуна, кьилиз акъудзавайди, гзаф къуллугъчийрин женгинин рехъ жуьрэтлувилин чешне тирди къейдна. Мисал яз, кьейидалай кьулухъ Россиядин Игитвилин тIварцIиз лайихлу хьайи М.Нурбагандов рикIел хкана.
Журналистри гайи са жерге суалрин арада Управленидиз къуллугъчияр кIвалахдал кьабулуниз талукьдини авай. Полициядин полковникди къейд авурвал, аниз анжах армиядин жергейра къуллугънавай ксар кьабулзава. Къуватдин органрин вири къурулушриз хас тир къайдада, абур патал комиссия тешкилзава, гуьгъуьнлайни стажировка кьиле тухузва. И суалдиз талукь яз ада мадни алава хъувурвал, къуллугъчийрин ва кIвалах тамамдаказ кьилиз акъудун патал къенин юкъуз са куьникайни кьитвал авач. Рекъемрин чIалалди лагьайтIа, алай вахтунда чи республикада и къурулушда 2500-лай виниз къуллугъчийри зегьмет чIугвазва.
Ведомстводинди тушир охранади хуьзвай объектрин къиметриз талукь яз чир хьайивал, квартира хуьн патал вацра — 260 манат гун лазим я, кьилдин касдин кIвал — 594 манат, машин хуьнизни — гьа и кьадар. Объект (квартира, кIвал, машин) и къуллугъди хуьзвайбурун жергеда тун патал Управленидин мукьвал алай подразделенидиз паспортни гваз фин герек я.
Эхирдайни Омар Нурбагандова кIвалахдин рекьяй юлдашриз ва ветеранриз къуллугъ арадал атана 70 йис тамам хьун тебрикна. Абурухъ чандин сагъвал, хизанра хушбахтлувал ва дуьнья ислягь хьана кIанивилин келимаяр лагьана.
Рагнеда Рамалданова
