2-апрелдиз Сергей Меликова Афгъанистандин вакъиайрин ветеранриз, Чернобылдин АЭС-дал хьайи авариядин нетижаяр арадай акъудайбуруз, 1999-йисан август-сентябрь варцара кьиле фейи женгерин иштиракчийриз яшайишдин рекьяй куьмек гунин месэлайриз талукьарнавай совещание кьиле тухвана.
РикIел хкин, Афгъанистандин вакъиайра 4 агъзурдалай виниз дагъустанвийри иштиракна, 141 касдиз элкъвена хайи ерийриз хтун кьисмет хьанач. Чернобылдин АЭС-дал хьайи авариядин нетижаяр арадай акъудайбурун арада 2500-лай виниз дагъустанвияр авай.
“Государстводи вичин хивез ихьтин гьерекатрин иштиракчийриз яшайишдин рекьяй алава куьмекар гун къачунва. Кьилди къачуртIа, Дагъустанда дяведин гьерекатрин ветеранрин хизанриз гьар вацра гузвай пулдин кьадар 2000-далай 10000-дал кьван гзафарнава. Идалайни гъейри, алатай йисалай гатIунна, “афгъанвийрин” яшайишдин шартIар хъсанарун патал республикадин бюджетдай 110 миллион манат пул ахъайзава…”, — къейдна Сергей Меликова.
Гуьгъуьнлай республикадин Кьил Чернобылдин, 1999-йисан халкьдин ополченидин отрядрин иштиракчийрин месэлайрални акъвазна.
РД-дин зегьметдин ва яшайишдин рекьяй вилик финин министр Абдурагьман Магьмудова хабар гайивал, алатай йисуз федеральный бюджетдай чара авур такьатрин гьисабдай Чернобылдин авариядин нетижаяр арадай акъудайбуруз, санлай къачурла, 55 миллион манатдин кьадарда аваз яшайишдин рекьяй куьмекар гузва. 2021-йисуз Дагъустанда 189 “афгъанви” цIийи кIвалералди таъминарна. ЦIи абурун кьадар 249-дал кьван артухарнава.
Гегьеншдиз РД-дин Кьилин официальный сайтдай кIелиз жеда.
«Лезги газет»
