1-апрелдиз Махачкъалада, Урусрин театрдин залда, манийринни кьуьлерин государстводин академический “Донбасс” ва “Лезгинка” ансамблрин концерт кьиле фена. Ана РД-дин Кьил Сергей Меликовани иштиракна.
“Дагъустандинни Донбассдин арада авай алакъайрихъ тарих ава: Ватандин ЧIехи дяведин йисара агъзурралди дагъустанвийри чIехи уьлкведихъ галаз санал Украина фашистрикай азад авунин женгера иштиракнай. ЦIуд йисар арадай фейила, гьа ихьтин везифа къе а женгерин иштиракчийрин хтулринни птулрин хиве гьатнава.
“Коллективный Западдиз” Урусатдин вири крарал, гьерекатрал, гьа жергедай яз, медениятдални къадагъа эцигиз кIанзава. Ихьтин шартIара саналди тухузвай медениятдин мярекатрихъ еке метлеб ава.
“Донбасс” ансамблди Урусатдин жуьреба-жуьре регионра гузвай концертри нубатдин сеферда медениятдихъ сергьятар авачирди тестикьарзава”, — лагьана С.Меликова.
Ада гьакIни “Донбасс” ансамблдин са жерге артистрив Дагъустандин государстводин шабагьар вахкана. Къейд ийин хьи, республикадиз мугьман хьанвай ансамблди 2-апрелдиз Дербентда, Лезгийрин госмуздрамтеатрда, чIехи концерт гана.
«Лезги газет»
