Алатай гьафтеда Сергей Меликов республикадин яратмишдай интеллигенциядин векилрихъ — писателрихъ, журналистрихъ, художникрихъ, композиторрихъ, кинематографистрихъ, архитекторрихъ, театрдин деятелрихъ галаз гуьруьшмиш хьана.
Гуьруьшдал Дагъустандин Кьили медениятди садвал мягькем хьуниз къуллугъзавайди, акьалтзавай несилар ватанпересар яз тербияламишунин карда кьетIен чка кьазвайди къейдна.
Мярекатдин иштиракчийри яратмишдай тешкилатрин кIвалах, абурун вилик акъвазнавай месэлаяр, государстводин патай куьмек гунин мумкинвилер веревирдна.
РД-дин театррин деятелрин Союздин регьбер Айгум Айгумова республикада “Актердин кIвал” ачухиз куьмек гун тIалабна. С.Меликова и месэладин гьакъиндай кIвалах кьиле физвайдакай хабар гана. РД-дин культурадин министр Зарема Бутаевадин гафаралди, “Актердин кIвал” филармониядин дараматда кардик кутада.
Писателрин Союздин кIвалахдикай анин регьбер Мегьамед Агьмедова суьгьбетна. Адан гафарай малум хьайивал, писателрин тешкилатди гьар йисуз ЮНЕСКО-дин къаюмвилик кваз эдебиятдин Р.Гьамзатован тIварунихъ галай международный “Лацу дурнайрин йикъар” фестиваль тешкилзава. Къведай йисуз Урусатдин писателрин Союзди уьлкведин 50 региондин яратмишдай векилрин иштиракчивал аваз чIехи пленум кьиле тухудайвал я.
“Лезгинка” ансамблдин регьбер Жамбулат Мегьамедова медениятдив кьетIендиз эгечIунай ва ам вилик тухунин карда куьмекар гунай республикадин руководстводиз сагърай лагьана. Вичин рахунра ада хореографрин аттестация тухунин игьтияж авайди, жегьил пешекарар гьазурунин месэла мадни важиблу тирди къейдна.
РД-дин журналистрин Союздин председатель Али Камалова телеф хьайи журналистрин экуь къамат эбеди авун патал гуьмбет эцигун герек тирдакай ва республикадин милли чIаларал акъатзавай изданийрихъ авай месэлайрикай лагьана.
С.Меликова гуьруьш менфятлуди хьайиди ва къарагъарай месэлайриз талукь яз герек тир серенжемар кьабулдайди къейдна.
«Лезги газет»
