И мукьвара  республикадиз къецепатан уьлквейрай тир хуьруьн майишатдин хилен пешекарар мугьман хьунин нетижада Дагъустанда Туьркиядин компаниядин векилхана ачухдай къарар кьабулнава.

РД-дин экономикадин ва мулкар виликди тухунин министерстводин пресс-къуллугъди хабар гузвайвал,  алава офис, Дагъустандин карчиярни галаз,  260 гектардилай  чIехи майданда фад бегьердал къведай жуьредин багъманчивилин хилехъ галаз алакъалу саналди тир карханаяр ва производствояр арадал гъунин кIвалахдал  машгъул жеда.

И майданрикай 120 гектар багълар — Дербент, 100 гектар – Сергокъала районрин ва 40 гектар Южно- Сухокумск шегьердин чилерик акатзава.  ГьакIни Южно- Сухокумск, Къизляр шегьерра,  Дербент ва Сергокъала районра 35 гектардин майданра  алай аямдин теплицайрин майишатар  кардик кутадайвал я. Абурун бинедаллаз суьрсет санал кIватIдай  ва  маса гудай центраяр (ОРЦ) тешкилда.

Республикада гьасилнавай ва гьялнавай хуьруьн майишатдин суьрсет маса гунин  карда  ОРЦ-рин Милли ассоциациядин исполнительный   директор Владимир Лищука куьмек гуда.

ОРЦ-рикай виридалайни чIехиди Дербент районда ава. Ана 20 агъзур тонн продукт хуьдай мумкинвал ава.

«Лезги газет»