20-23-декабрдин йикъара республикадин меркезда, Милли библиотекадин дараматда, регионрин уртах “СУВЕНИР ЭКСПО-2018” выставка-ярмарка кьиле фена.
Мярекатдин тешкилатчи тир “АНЖИЭКСПО” компанияди и выставка декабрдин эхирра кьиле тухунихъ махсус метлеб авай – алукьзавай ЦIийи йисан суварин вилик республикадин агьалийриз ина чпин багърийриз, ярар-дустариз чпиз тешпигь авачир, масана тикрар техжезвай гьар жуьредин гуьзел пишкешар маса къачудай мумкинвал арадал гъанвай.
Республикада сифте сеферда яз тешкилнавай “СУВЕНИР ЭКСПО” выставка-ярмарка агъадихъ галай паярикай ибарат тир: ЦIийи йисан суварихъ галаз алакъалу къугъвадай ва елка безетмишдай шейэр, маскараддин парталар, ядигарар, антиквариат, сятер, халкьдин художественный сеняткаррин гъиликай хкатнавай затIар, заргарвилин безекар, басма авунихъ ва рекламадихъ галаз алакъалу шейэр, кIвал безетмишун патал гьар жуьредин къаб-къажах. ЦIийи йисан сувар асул гьисабдай аялрихъ галаз алакъалуди я, гьаниз килигна, ина аялрин рикI аладардай, абур машгъулардай шейэрни тIимил авачир. Ядигаррин выставкадин дезгейрал гъилералди гьазурнавай жуьреба-жуьре затIарни — хранвай, нехиш акъуднавай, кьурурнавай кьаларикай ва цуькверикай туькIуьрнавай затIар, запунар, тIебии косметика ва са жерге маса шейэрни тIимил алачир.
“АНЖИЭКСПО” компанияди тешкилзавай выставкайрин мад са кьетIенвал: мярекатдин иштиракчияр ва мугьманар гьевесламишдай, машгъулардай, гуьгьуьлар ачухардай программа гегьеншди, фикир желбдайди тир. Идалайни гъейри, выставкадиз мугьман хьайи гьар са касдивай и ва я маса шей туькIуьрунин сирер чирдай мастер-классра иштиракиз, месела, жуван гъилералди хъенчIин къапар туькIуьриз жезвай.
“И выставкади ядигаррин ва пишкешрин алай аямдин индустрияда авай гьалар тамамдаказ ахтармишдай мумкинвал гузва. Ина иштиракзавай ксар патал им чпин продукция майдандиз акъуддай, чпикай гегьеншдаказ хабар гудай лап хъсан мумкинвал я”, — лугьузва “Анжиэкспо” компаниядин генеральный директор Мукаил Исмаилова. Адан гафаралди, компанияди вичин вилик эцигнавай макьсад бизнесдинни эхиримжи муьштеридин арада маса кас тежедайвал авуникай ибарат я.
“Сувенир ЭКСПО-2018” выставкада, санлай къачурла, 30 компанияди иштиракна. Абурукай пудай са пай уьлкведин маса регионрай атанвайбур тир.
Къейд ийин, “Анжиэксподин” выставкайрин календарь гегьеншди я. ИкI, алукьзавай 2019-йисуз компанияди республикада са кьадар выставкаяр кьиле тухун пландик кутунва. Кьилди къачуртIа, меркездин ва республикадин агьалияр патал тешкилда: “Стартапы – наше будущее”, “Транспорт. Логистика. Связь”, “Выставка одежды, обуви и кожгалантереи. Мода”, “Строительство, архитектура, инновации”, “Экспомебель-Дагестан”, “Дагестанская туристическая ярмарка”, “КавказЮвелир”, “Школьная пора”, “Ярмарка здоровья и народной медицины”, “Агропромышленная выставка-форум”, “AQUATHERM-Dagestan”, “Сувенирэкспо”.
Саки вири и выставкаяр “Анжиэкспо” компанияди цIийиз гъиле кьунвайбур я. И кардин асул макьсад выставкайринни ярмаркайрин кIвалах гуьнгуьна тун, агьалияр патал и кар дугъриданни, менфятлу, хийирлу мярекатриз элкъуьрун ва, гьелбетда, бизнесдиз къулай шартIар тешкилун я.
Жасмина Саидова
