Дагъустандин Кьил Сергей Меликова 22-мартдиз РД-дин Общественный палатадин кIвалахдиз талукьарнавай совещание кьиле тухвана. Идакай “Лезги газетдиз” республикадин Кьилин пресс-къуллугъди хабар гана.
Мярекат ачухдайла, С.Меликова къейд авурвал, кьилин макьсад Дагъустандин сиясатдин ва жемиятдин къуватрин арада алакъайрин менфятлувал хкажун я.
“Алай вахтунда жемиятдин тешкилатрин кIвалах вилик жергейра ава. Мисал яз, общественникри, къайгъудар инсанри, карчийри, жергедин агьалийри Украинада арадал атанвай четин гьалара ДНР-дин, ЛНР-дин агьалийриз куьмек гунин карда активнидаказ иштиракзава. Дагъустандай анриз рекье твазвай недай-хъвадай суьрсетдин, парталрин ва маса затIарин кьадар къвердавай гзаф жезва. Ихьтин шартIара жемиятдин тешкилатрин важиблувални артух хьун тажуб жедай кар туш”, — лагьана региондин Кьили.
С.Меликова гьисабзавайвал, республикадин исполнительный гьукумдинни жемиятдин тешкилатрин арада авай алакъайриз кьетIен фикир гун герек я. “Вири ведомствойрин кIвалах общественный гуьзчивилик хьана кIанда. Ихьтин къайдадин нетижада чалай жуьреба-жуьре ведомствойрин кIвалахда авай кимивилер винел акъудиз ва, энгел тавуна, абур арадай акъуддай серенжемар кьабулиз алакьда. Мадни башкъа, Общественный палатади республикадин кьиле авайбурал яшайишдин жуьреба-жуьре хилериз талукь теклифар, жергедин агьалийрихъ авай фикирар агакьарунилайни виликди финин еришар аслу я”, — алава хъувуна РД-дин Кьили.
Гуьгъуьнлай 2021-йисуз Общественный палатади кьиле тухвай кIвалахдикай ва алай вахтунда тешкилатдин вилик акъвазнавай месэлайрикай анин председатель Абдулмуъмин Ибрагьимова ихтилатна.
Мярекатда гьакIни РД-дин Гьукуматдин Председатель Абдулмуслим Абдулмуслимова, Халкьдин Собранидин Председатель Заур Эскендерова, РД-дин Кьилин ва Гьукуматдин Администрациядин Руководителдин сад лагьай заместитель Махач Омарова, РД-дин Кьилин общественный куьмекчи Людмила Авшалумовади, РД-дин Кьилин патав кардик квай гражданвилин общество вилик тухунин ва инсанрин ихтияррин рекьяй Советдин председатель Зикрула Ильясова иштиракна.
Совещанидин кIвалахдикай гегьеншдиз Дагъустандин Кьилин сайтдай кIелиз жеда.
«Лезги газет»
