СтIал Сулейманан райондин кьил Нариман Абдулмуталибова и йикъара райондин администрациядин аппаратдин ва массовый информациядин такьатрин коллективар информагентстводин цIийи регьбер  Г.А. Камиловадихъ  галаз танишарна.

Райондин кьили лагьайвал, Гуьллер Айдунбеговнади культурадин ва журналистикадин хилера 35 йисалай виниз гьакъисагъвилелди кIвалахна. Хейлин йисара ада “Дагъустан” РГВК-да­ телевиденидин проектар кьиле тухвана. Ам документальный са шумуд фильмдин ва телевиденидин хейлин очеркрин авторни я. Абурун жергедай яз “Созвездие Алкадари”, “Поколение”, “Герои страны гор” ва масабурун тIварар кьаз жеда.

ЦIийи къуллугъдал Гуьллер Камилова райондин руководстводин теклифдалди хтана. Икьван чIавалди ада “Россия — зи тарих” тарихдин паркуна культурадинни марифатдин отделдин начальник яз кIвалахзавай.

Нариман Абдулмуталибова Гуьллер Айдунбеговнадиз цIийи къуллугъ мубарак авунихъ галаз санал инанмишвал къалурна хьи, ада муниципальный медиаресурсар мадни вини дережадиз акъудда.

Райондин сайтдин, КТВ-дин ва “Куьредин хабарар” газетдин руководителар тир Закир Бидирханова, Эльвира Небиевади ва Асият Мирзалиевадини Гуьллер Камиловадиз цIийи къуллугъ мубаракна, адахъ кIвалахда агалкьунар хьана кIанзавайди лагьана.

Хазран Кьасумов