Дагъустандин физический культурадин ва спортдин министерстводин сайтда хабар ганвайвал, алатай гьафтеда Махачкъалада, Дуствилин кIвалин чIехи залда, РД-дин физический культурадин ва спортдин министрдин везифаяр вахтуналди тамамарзавай М.Мегьамедован регьбервилик кваз республикадин спортдин школайрин директоррин, спортдин жуьрейрай федерацийрин кьиле авай ксарихъ, тренеррихъ галаз гегьенш совещание кьиле тухвана. Анал спортшколайрин хатасузвилиз ва бязи спортшколайра чинебадаказ пулар кIватIуниз талукь месэлаяр веревирдна…
Спортшколайра хатасузвал таъминаруниз талукь месэладин патахъай М.Мегьамедова анра хатасузвал хуьн тешкилзавай ксар и месэладив хиве еке жавабдарвал аваз эгечIуниз эвер гана.
— Спортдин гьич са школа ва маса объект ахтармишунар кьиле тухудай, къайда-къанун хуьдай ва гуьзчивалдай органрин патай дикъет тагана тадач. Къе инал чна веревирдзавай месэлаяр кьилиз акъуд тийизвай школайрин директорар чпин къуллугърилай алудда, — къейдна М.Мегьамедова.
РД-дин физический культурадин ва спортдин министрдин везифаяр вахтуналди тамамарзавайдан советник Рафик Ханзарова спортдин объектар йифди-югъди хуьдай къаравулралди, гуьзчивалдай тадаракралди ва пропускрин къурулушралди таъминарунин важиблувал къейдна.
— Алай вахтунда акатай нивай хьайитIани спортшколадиз гьахьиз жезва. Спортдин идарайрин къуллугъчияр ва тренерар-муаллимар, гьакIни анра вердишвилер къачузвай аялар патал пропускрин къайда кардик кутун лазим я. Идалайни гъейри, вири къаравулриз и ва я маса гьалара вич гьикI тухудатIа ва вичи вуч авун лазим ятIа чир хьана кIанда. Эгер абур и крарин гъавурда авачтIа, абур гъавурдик кутун, лазим инструктаж тухун герек я, — алава хъувуна Рафик Сабировича.
Совещанидал спортшколайра цIаяр кьуникай хуьниз талукь къайдайрикай Дагъустандин МЧС-дин векилди лагьана. Адалай гуьгъуьниз Мегьамед Мегьамедова ачух чар раижна, ана тайин тушир са жерге тренерри зонайрин акъажунрин тешкилатчийри спортсменар са кьадар взносар гуниз мажбурзавайдакай кхьенвай.
— Взносар рехъ гана виже къведай кар туш, — къейдна министрдин везифаяр вахтуналди тамамарзавайда. — Аялривай пулар кIватIиз ихтияр ганвай документ авач. Квез са вуч ятIани ийиз кIанзавайла, чал алукь. Чи идара гьамиша ачух я, квез и кар лап хъсандиз чизва. Куьн министерстводиз атун ва авайвал вири лугьун лазим тир. Зун вири месэлаяр гьялиз гьазур я, куь теклифрихъ яб акалун патал за къе куьн вири кIватIнава.
Районрин физический культурадин ва спортдин органрин кьиле авай ксарихъ жуьреба-жуьре серенжемар тешкилдай пулдин такьатар авач. Гьавиляй гуьгъуьнин йисан бюджет арадал гъидайла, куьне квез тухуз кIанзавай спортдин серенжемар календарда къалурна кIанда, абур кьиле тухун патал пулдин такьатар бюджетдик кутадайвал. Зонайрин вири ва адалай виниз тир дережадин акъажунар республикадин физический культурадин ва спортдин министерстводи, гьакIни спортдин жуьредай кардик квай федерацияди тайинарун лазим я. Гьар гьикI хьайитIани, акъажунар кьиле тухудай вахтунда спортсменривай и ва я маса кьадарда аваз пулар кIватIун гьич рехъ гана кIандай кар туш. Им законодательстводин бинеяр чIурун я, — алава хъувуна Мегьамед Мегьамедова.
Совещанидал республикадин тренерарни рахана. Кьилди къачуртIа, спортдин гзаф федерацийри гьич са кIвалахни тийизвайдакай лагьана. И жигьетдай М.Мегьамедова къейдна хьи, федерацийрин кьиле гафаралди ваъ, краралди спорт вилик тухудай, ам машгьурдай ксар акъвазун лазим я. Федерацийри чпин бюджет арадал гъана, спонсорар желбна ва спортсменрихъ галаз спортдин жуьре вилик тухун патал тайин кIвалах кьиле тухвана кIанда.
Мегьамед Мегьамедова кIватI хьанвайбурун виридан рахунрихъ, теклифрихъ яб акалайдалай кьулухъ, абур вири кхьена, РД-дин физический культурадин ва спортдин министерстводиз рекье туниз эвер гана.
Гьазурайди — Рагнеда Рамалданова
