Сулейман-Стальский район неинки алимрин, шаиррин, гьакIни машгьур спортсменрин маканни я. Европадин ва дуьньядин дережадин спортсменар инай гзаф акъатна. Жаванри ва жегьилри машгьур кьуршахар кьадайбурун, боксеррин, дзюдоистрин, самбистрин рехъ давамарзава. Абурукай сад ери-бине КIварчагърин хуьряй тир Имран Абдиев я.
Алай вахтунда ада Москвада физический культурадин ва спортдин “Спарта” колледжда кIелзава. Ада спортдин акъажунра, Россияда ва къецепатан уьлквейра тухузвай чIехи дережадин турнирра иштиракзава, хъсан нетижаяр къалурзава. ИкI, мисал яз, И.Абдиева 2016-йисуз Омск шегьерда жаванрин арада панкратиондай Россиядин кIвенкIвечивал патал тухвай акъажунра 2-чка, 2017-йисуз Лоутраки (Греция) шегьерда Европадин кIвенкIвечивал патал жегьилрин арада ва Минск (Белоруссия) шегьерда кьиле фейи международный турнирра 1-чкаяр кьуна.
Алай вахтунда Имран Абдиева панкратиондай дуьньядин кIвенкIвечивал патал кьиле фидай чемпионатдиз гьазурвилер аквазва.
Лугьун лазим я хьи, Имрана спортда вичин сифте камар Кьасумхуьруьн 1-нумрадин ДЮСШ-дин КIварчагърин хуьре кардик квай филиалда тежрибалу тренер, боксдай спортдин мастервиле кандидат Альберт Межидован гъилик къачунай. 2011-2014-йисара Имрана боксдай Кьиблепатан Дагъустандин акъажунра 5 сеферда 1-чкаяр, республикадин пуд турнирда ва Кеферпатан Кавказдин федеральный округдин кIвенкIвечивал патал акъажунра 2-чкаяр, 2011-йисуз Каспийскда ва 2012-йисуз Первомайскда Дагъустан Республикадин кIвенкIвечивал патал, гьакIни Пятигорск (2011-йис), Астрахань (2012-йис) ва Дагъустандин Огни (2013-йис) шегьерра кьиле фейи Вирироссиядин турнирра 1-чкаяр кьуна.
Тренер Альберт Межидова чаз лагьайвал, КIварчагърин хуьре боксдал машгъул жедай йисара Имран Абдиева рингда 67 бягьс тухвана, абурукай 58 акъажунра гъалибвал къачуна.
Вахъ спортда мадни чIехи агалкьунар хьурай, кIварчагъви Имран.
Хазран Кьасумов
