Алатай гьафтеда Махачкъалада, «Дагъустан» РИА-дин конференц-залда кьиле фейи пресс-конференциядал Дагъустанда WorldSkills Russia (Ворлдскилс Россия, WorldSkills-им коммерциядинди тушир международный гьерекат, адан макьсад вири дуьньяда рабочий пешейрин кесерлувал хкажун ва абур вилик тухун я) гьерекатдин региональный координационный центрадин руководитель, РД-дин зегьметдин ва яшайишдин рекьяй вилик финин министерстводин жегьилар кIвалахдалди таъминарунин рекьяй “Агалкьун” центрадин директор Шамил Мегьамедов 27-февралдилай 2-мартдалди Дагъустанда «Жегьил пешекарар» (Ворлдскиллс Россия) региональный III чемпионатдиз гьазурвилер акуникай ва мукьвара Москвада «Насигьатчи-2018» тIвар алаз кьиле фейи Вирироссиядин форумдин нетижайрикай рахана.
Къейд авун лазим я хьи, чемпионатдин тешкилатчи Дагъустан Республикадин Кьилин ва Гьукуматдин Администрациядин куьмекни галаз РД-дин зегьметдин ва яшайишдин рекьяй вилик финин министерство я. Чемпионат ачухуниз талукь мярекат меркезда «Дуствилин кIвале», акъажунриз талукь мярекатар лагьайтIа, Каспийск шегьердин аялринни жаванрин спортдин “Энергия” центрада, Махачкъалада (технический, ДГМУ-дин медицинадин, автомобилринни рекьерин колледжра) ва «Анжи-Арена» ресторанда, Къизлярда (Къизлярдин пешекарвилинни педагогикадин колледжда) ва буйнаксда (Буйнакскдин хуьруьн майишатдин колледжда) кьиле фида.
Малум хьайивал, «Насигьатчи» форумда чи республикадай анжах са касди-Россиядин лайихлу тренер Абдулманап Нурмегьамедова- иштиракна.
-Вичин рахунра тренерди Дагъларин уьлкведа насигьатчивилин кIвалах гьикI тухузватIа гьадакай, спортзалдиз атай гьар са аялдихъ галаз тухузвай кIвалахдикай лагьана. Идахъ галаз сад хьиз тренерди вичин уьмуьрдай яз ихьтин рекъемдикайни хабардарна: спортзалдиз адан гъилик тербия ва спортдин сирер чириз атай 10 етим аялдикай дуьньядин чемпионар хьана. Адан суьгьбетди форумдин иштиракчийриз екез таъсирна, — къейдна вичин рахунра Шамил Мегьамедова.
Чемпионатдиз талукь яз Ш.Мегьамедован гафарай малум хьайивал, цIи ана кьилин 23 пешедай (компетенциядай): электромонтаждай, заргарвиляй, ресторанриз талукь сервисдай, керпичрикай цал эцигунай, эцигунриз талукь кIвалахрай, сваркадин технологийрай, компьютерламишнавай (ЧПУ) станокралди токарвилин ва фрезерный кIвалахрай, гъвечIи классра тарсар гунай, медицинадинни яшайишдин рекьяй гелкъуьнай ва икI мад 16 йисалай 22 йисалди яшара авай жегьилрин арада акъажунар кьиле фида. Идалайни гъейри, 3 компетенциядай (мобильная робототехника, управление беспилотными летательными аппаратами, промышленный дизайн) 10-далай 17 йисалди яшара авай жаванризни чпин устадвал къалурдай мумкинвал гуда.
«Фотография», «Прикладная эстетика», «Шашлычное дело», «Обувное дело» компетенцийрай презентацияр кьиле тухуда. Алай йисуз чемпионатда чпин устадвал къалурун патал арзаяр вуганвай ксарин арада неинки республикадин, гьакIни Санкт-Петербург, Кубань шегьеррай ва Астраханский областдай тир ссузрин студертарни ква. Санлай къачурла, абурун кьадар 150-далай виниз жеда. Докладчиди къейд авурвал, абуру чкайрал кьиле фейи паюна чпин алакьунар къалуруналди и чемпионатда иштиракдай мумкинвал къазанмишна.
Пресс-конференциядал Дагъустандин ссузра чирвилер ва вердишвилер къачузвай студентрал, анрин материально-технический база усалди хьуниз килигна, гьалтзавай четинвилерикайни лагьана. Ш.Мегьамедова мукьвал вахтара и татугайвилер арадай акъудуник умудар кутунвайди къейдна. Гьавиляй гьелелигда чемпионатда гъалиб хьайибур, Вирироссиядин ва международный дережадин чемпионатрани акъажунра иштиракун патал хъсан гьазурвал акунин мураддалди, материально-технический база хъсан тир регионриз рекье твада.
Къейд авун лазим я хьи, чемпионатдин сергьятра аваз кьиле фидай мярекатра Дагъустандин Кьилин везифаяр вахтуналди тамамарзавай Владимир Васильев, РФ-дин Кеферпатан Кавказдин крарин рекьяй министрдин заместитель Михаил Развожаев, РД-дин Гьукуматдин Председатель Артём Здунов, адан Сад лагьай заместитель Анатолий Къарибов ва гзаф маса ксарни атун гуьзлемишзава. Чемпионат ачухуниз ва агалуниз талукьарна культурадин еке программаяр гунни пландик ква.
Чемпионатдиз талукь яз и ва я маса суалар пайда хьайитIа, РД-дин «РМЦЗ «Успех» ГБУ-дин пресс-къуллугъдиз, телефондин 8 (988) 655-22-99 нумрадиз зенг яна, гьакIни www.uspehrd/com сайтдай чириз жеда.
Рагнеда Рамалданова
