И йикъара РД-дин тамарин майишатдин комитетдин председатель Вагьаб Абдулгьамидова ведомстводик акатзавай вири идарайрин регьберрин иштираквал аваз кьиле тухвай совещанидал вилик эцигнавай месэлаяр кьилиз акъудзавай гьал веревирдна, гьа гьисабдай яз, тамари цIаяр кьунин къурхулувал гьеле алатнавачирди къейдна. Идакай чаз комитетдин пресс-къуллугъди хабар гана.
Кьилди къачуртIа, совещанидал протоколрин тапшуругъар кьилиз акъудзавай ва тамарин участокар кирида кьуниз талукь яз пулар кIватIзавай тегьер веревирдна. И жигьетдай В.Абдулгьамидова кIвалахар графикдин бинедаллаз вахтунда ва разивал ийиз жедайвал кьилиз акъудзавайди къейдна. Амма гзаф вахтара са цIелхемдилай арадал къвезвай еке мусибатдин – тамарик цIаяр акатунин хаталувал гьеле алатнавачирди къейд авуналди, кIватI хьанвайбурун фикир ада генани тапшуругърал, теклифрал желбна. Кьилди къачуртIа, ада агьалийрихъ, гьа жигьетдай яз школайра кIелзавай аялрихъ галазни цIаяр кьунин жигьетдай мукъаятвал хуьниз талукь суьгьбетар датIана тухун герек тирди, гектарралди тамари цIаяр кьунин вилик пад кьаз хьун гьар са касдин жавабдарвилелай аслу тирди къейдна.
Совещанидал гьакIни тамар хуьниз, цIийибур кутуниз ва календардин бинедаллаз кьилиз акъудна кIанзавай са жерге маса месэлаярни веревирдна.
РикIел хкин: эгер куьн себеб яз тамари цIаяр кьунин дуьшуьш арадал атайтIа ва я куьн ихьтин дуьшуьшдал расалмиш хьайитIа, телефондин 8 800-100-94-00 нумрадиз зенг авуна, хабар гуз жеда! Им вири уьлкведин мулкунал сад тир, пулсуз ва югъди-йифди кардик квай нумра я.
Чи мухбир
