Инсандин кьилел къав хьун уьмуьрда важиблу месэлайрикай сад тирди садани инкардач. Етим аялрин уьмуьрда – генани. Махачкъаладин «Россия — зи тарих» тарихдин парк и йикъара етим хейлин аялрин мурад кьилиз акъатай чкадиз элкъвена. ИкI, 23 йис тамам хьанвай са шумудав кIвал маса къачун патал яргъалди вилив хвейи сертификатар агакьарна. Абур вахкуниз талукьарнавай мярекатда РД-дин эцигунрин, архитектурадин ва ЖКХ-дин министр Артур Сулейманова ва адан заместитель Салам Гьасайниева, гьакIни Дагъустандин прокурордин заместитель Сергей Антонова иштиракна.
Сертификатар вахкудайла, Артур Сулейманова къейд авурвал, Дагъустанди, уьлкведин регионрикай сифтегьанбурун жергеда аваз, етим аялриз куьмекар гудай алава такьатар жагъурунин механизм кардик кутуна. ИкI, адан куьмекдалди 189 етимдиз алай йисуз вичин хсуси квартираяр маса къачудай мумкинвал хьанва.
— Кьилиндини ам я хьи, маса къачудай квартира ва чка жегьилдивай вичивай хкягъиз жезва, ам администрацияди хкязавач. Са жерге вариантрикай менфят къачуналди, квевай куь рикIиз кIандайди хкягъиз жезва. РикIиз кIан ятIа, квез, хсуси такьатар алава хъувуна, гьакI кредитдикай ва я дидевилин капиталдикайни менфят къачуна, генани гегьенш квартира маса къачудай мумкинвал ава, — малумарна министрди.
Ада мадни алава хъувурвал, республикада и сертификатар къачун патал 304 касдилай арзаяр атанва.
— И механизмдин, яни документар кьабулунин ва пулдин такьатар чара авунин ачухвал, михьивал ва регьятвал таъминарун чун патал мадни важиблу кар тир. ИкI, чун муниципалитетра «кьве жуьредин» учиррикай азад хьана ва сад тир журналдин учирдин бинедаллаз сертификатар чара ийизва.
РикIел хкин: сертификатар гьукуматди квартираяр маса къачун патал етимриз гузвай пулдин такьатар я. Къенин юкъуз адан кьадарди 2 миллионни 334 агъзур манат тешкилзава. И программади гьукуматдин такьатрин гьисабдай тир 33 кв. метрдилай чIехиди тир квартира (винидихъ къейднавайвал, жуван хсуси, кредитдин ва я дидевилин капиталдин такьатар алава хъувуналди) маса къачудай мумкинвал гузва.
Регина Семедова
