ЦIинин зулухъ Россиядин армиядиз 133 агъзур касдиз эвер гудайвал я. И важиблу месэла Ахцегь, Докъузпара ва Рутул районра тешкилнавай гьалдикай РВК-дин комиссар, подполковник Рафик Мегьамедова суьгьбетзава.
— Чаз тайинарнавай пландалди пуд райондай 90-далай гзаф жегьилар армиядиз рекье твада. Вири призывникрив вахтунда повесткаяр агакьарнава. Гатфарин призывдин план, четинвилер акьалтнатIани, чна 100 процентдин тамамарна.
Четинвилерикай рахайтIа, бязи призывникрин диде-бубайри гьар жуьре багьнайралди чи комиссиядин кIвалахдиз манийвалзава. Са патахъай, чпин веледар СВО-дик акатунин игьтият авай абурун гъавурда чун акьазва. Ахьтин диде-бубайрихъ галаз чна гъавурдик кутунин кIвалах тешкилнава.
Кьвед лагьай четинвал чи учётда-пропискада авай жегьилар Россиядин маса регионрай армиядиз тухунихъ галаз алакъалу я. Вахтуналди яшамиш жез ва я кIвалахиз физвай маса регионра абур, законди истемишзавайвал, 3 вацран къене военный учётда акъваззавач. И кар малум хьанмазди, чкадин гьукумдарри абур чпин план-гьисабдай армиядиз рекье твазва.
Призыв — им са РВК-дин коллективди тухузвайди туш. Им диде-бубайрини, муаллимрини, чкадин администрацийрини, къайдаяр хуьдай органрини — вирибуру санал гьялна кIанзавай акьалтIай важиблу месэла я.
Армиядикай кьасухдай кьил къакъудун еке тахсиркарвал я. Призывникрихъ ва абурун диде-бубайрихъ галаз чи таблигъатдин кIвалахди нетижа тагай дуьшуьшра чун къайдаяр хуьдай органривай куьмек тIалабуниз мажбур жезва. ИкI, шаз са шумуд касдал 5 ва 10 агъзур манатдин жермеяр илитIна.
Армиядин къуллугъдиз гьазурвилин дережадикай рахайтIа, виликан йисарин жегьилрив гекъигайла, авайвал лугьун, вири патарихъай зайиф я. ДатIана компьютеррин вилик квай, гъиле мобильный телефонар авай аялрин сагъламвилин дережа гьихьтинди хьун мумкин я? Парабурун вилерин ишигъ зайиф я, давление ава ва икI мад.
Чи жегьилар Россиядин военный вири округрин кьушунриз рекье твазва. ЧIехи пай жегьилри чешнелудаказ къуллугъзавайвилин гьакъиндай чаз абурун командиррилай хквезвай чухсагъулдин чарари шагьидвалзава.
Ахцегь райондай дяведин махсус серенжемда 600-дав агакьна жегьилри, гъиле яракь аваз, викIегьвилелди иштиракзава.
Дашдемир Шерифалиев
