«Ча-а-ан» лагьайла ваз акI жемир,
Чан гуда ваз вун патал.
Ваз а касди «чан» лугьузва,
Вичиз куьмек хьун патал.
И шиир 1962-йисуз Дагъустандин гьукуматдин университетдин филологиядин факультетдик экечIна, адан милли ва урус чIаларин отделение акьалтIарай, 1967-йисалай 2020-йисалди хайи хуьруьн мектебда датIана муаллимвал авур касди кхьена. Гьайиф хьи, а йисуз инсультди тади гайи зун кIвалах туниз мажбур хьана.
Жуван рикIяй атай и гъвечIи шиир мисал гъана заз мад сеферда лугьуз кIанзава: килиг, гьикьван гуьзел ятIа чи дидед чIал! Вичелди инсандин гьихьтин фикир хьайитIани лугьуз, адан гуьгьуьлдин гьихьтин рангар хьайитIани къалуриз жедай чIал. Вичелди Етим Эмин рахай ва теснифай дилавар чIал. Гуьгъуьнлай цIудралди пешекарри-алимри ахтармишна къайдадиз гъанвай чIал.
Садавайни инкар ийиз жедач: хайи чIал амай кьван халкьдин уьмуьр давам жеда. Гьавиляй, лугьузва за — уьмуьрлух аялриз чIалан тарсар гайи яшлу муаллимди, чи вилик акъвазнавай виридалайни важиблу месэла — акьалтзавай несилдиз дидед чIалан тIям чирун я. И фикир, гьелбетда, цIийиди туш, амма ам датIана рикIел хвена кIанзавайди я, гьавиляй тикрар хъувуникай зарар авач. Жуван фикирни заз ихьтин шиирдалди куьтягьиз кIанзава:
Инсан,
Чир хьухь:
Вахтуналди
Ганва ваз уьмуьр,
Сифте фагьум, ахпа хьуй кар…
Миллет квахьай къведач тIвар.
Абдулашим Гьажимурадов,
Мегьарамдхуьруьн район, Муьгъверган
