Хив райондин Межгуьлрин хуьруьн юкьван школадин педагогар, аялар гьа и школа акьалтIарай ва гила Россиядин армиядин лейтенант, Украинада кьиле тухузвай махсус серенжемдин иштиракчи Рагьимхан Мислимовахъ галаз гуьруьшмиш хьана.
Школадин директор Анвер Хидирова Мислимова кIелай вахт рикIел хкана.
— Рагьимхан низамлу, школадин къайдайрал амалзавай, тарсарив жавабдарвилелди эгечIзавай, чна тешкилзавай мярекатра хушвилелди иштиракзавай ва чIехи-гъвечIи чидай гада тир. Военный институт хкягъун, ана чешнелудаказ кIелунни дуьшуьшдин кар тушир. Адахъ гъвечIи чIавалай ватанпересвилин руьгь, Ватандиз къуллугъ авунин къаст авай. Вичин мурад ада кьилизни акъудна. Къе ам Россиядин офицер я, махсус серенжемдин игит я. Идан гьакъиндай Рагьимханан хурудал алай «Жуьрэтлувиляй» орденди, Суворован, «Дирибашвиляй», «Женгера тафаватлувиляй» медалри шагьидвалзава.
Рагьимхан Мислимованни аялрин арада ачух ва хуш суьгьбет кьиле фена. Ада вичин къуллугъдикай, серенжем кьиле физвай гьалдикай ихтилатна.
— Ватандиз намуслувилелди къуллугъ авун гьар са агьалидин буржи я, — лагьана Р. Мислимова. – Иллаки ихьтин вахтунда, США-диз, Евросоюздиз, чи мидяяр хьанвай уьлквейриз Россия барбатIиз кIанзавайла. Эхиримжи цIуд йисара абуру Украинада тухвай таблигъатдин кIвалахди майдандиз миллетбазар, Россиядиз акси къуватар акъудна. Абуру чпин халкь къирмишзавай дяведикни цIай кутуна. Гьар юкъуз абурун ракетайрик, гуьллейрик Донбассдин ислягь агьалияр, аялар рекьизва. Абур хуьн ва миллетбазрикай азад авун Россиядин армияди вичин хивез къачуна ва чна и четин ва важиблу везифа кьилизни акъудзава. Ватандиз вафалу инсанар, рухваяр хьун патал хъсандиз кIела, муаллимрихъ, диде-бубайрихъ яб акала, абурун меслятрал амал ая, жемиятдиз хийир гудай крар ийиз алахъ.
Аялри лейтенантдихъ галаз шикилар яна ва абур халис игитар чпин къвалав гвайдахъ агъуна. Гуьруьш ватанпересвилин тербия гунин тарсуниз элкъвена.
Чи мухбир
