Дербент райондин Хазар хуьряй (виликан К.Марксан тIварунихъ галай совхоз) тир подполковник Артур Насирова Россиядин армияда къуллугъиз хейлин йисар я. Военный институт куьтягьна лейтенант яз къуллугъдив эгечIай Насирова военный са шумуд округда жавабдар ва кьетIен везифаяр, командованиди вилик эцигай тапшуругъар дирибашвилелди тамамарна. ЧIехи командиррин ва вичин гъилик квайбурун патай гьуьрмет къазанмишна.
Украинада дяведин махсус серенжемдив эгечIайла Насирова къуллугъзавай полкни аниз рекье туна. Подполковник Херсондин областдин ЦIийи Каховкадин комендантвиле тайинарна. Женгериз, оборонадиз талукьбурухъ галаз санал хиве яшайишдин месэлаярни гьатна. Шегьер советрин девирда Каховкадин ГЭС эцигунихъ галаз санал арадал атайди я. Станция Советрин Союздин вири пипIерай атай инсанри эцигнай. Абурукай чIехи пайни шегьерда амукьна. Комендантди сифте нубатда миллетбазрин гужарикай, гъуьнтIуьникай азаднавай агьалийриз вири рекьерай куьмек гун тешкилна. Четинвилер гьар юкъуз ацалтзавайтIани, Росгвардиядин, чкадин гьукумдин, волонтеррин куьмекни галаз кар алай месэлаяр гьялуниз гзаф вахт серфна. Террористрин, чуьруькар арадал гъизвайбурун вилик пад кьуна. Шегьердин агьалийри чеб азаддаказ гьиссдай шартIар арадал гъана. Муракаб везифаяр лайихлувилелди тамамарай Насирован алахъунар «Ватандин вилик лайихлувилерай» ордендалди, Суворован медалдалди къейдна. Алай вахтунда Артур Насиров Волгоград шегьердин комендант я.
Хайи хуьруьз багърийрин патав ял ягъиз хтанвай Россиядин армиядин офицер Дербент райондин администрациядин кьил Мавсум Рагьимова кьабулна. Абурун арада хуш суьгьбет кьиле фена.
— Чна Ватандин итижар баркаллувилелди, викIегьвилелди хуьзвай, адаз вафалувилелди къуллугъзавай куьн хьтин рухвайрал дамахзава, — лагьана М.Рагьимова. – Махсус серенжемда уьтквемдаказ иштиракзавай районэгьлияр мад ава. И йикъара райондай са шумуд кас Дагъустанда тешкилай гуьгьуьллубурун «Каспий» батальондик экечIна. Абур чпиз тайинарнавай чкадив агакьнава. Агъунва, абуруни махсус серенжем фад куьтягьуник чпин пай кутада.
Артур Насирова райондин регьбердиз сагърай ва Россиядин халкь далудихъ галай армияди уьлкведин Президентди вилик эцигзавай везифаяр ян тагана тамамардайдакай лагьана.
Чи мухбир
