Алатай гьафтеда «Лезги газетдин» пресс-конференцийрин залда республикадин милли газетрин векилар дяведин махсус серенжемдин иштиракчи, лейтенант, подразделенидин командир, Рутул райондин Жных хуьряй тир Гьажиев Маликахъ галаз гуьруьшмиш хьана.
Ам военный къуллугъчидин хизанда дидедиз хьана. ГъвечIи чIавалай военный форма адан рикIи чIугуна. Школа куьтягьайла «гьиниз фида, гьи пеше хкяда?» лугьудай суаларни арадал атанач. Жаван Москвадин командирар гьазурдай кьилин училищедик экечIна. Курсантди кIелунра, военный рекьяй вердишвилер къачунин, техника чирунин, кьетIен тапшуругъар тамамарунин карда вичихъ къаст ва алакьунар авайди къалурна. Кьуд йисуз гележегда къуллугъдайла герек къведай чирвилер, вердишвилер къачуна. Лейтенант Москвадин областда авай Кантемирован машгьур дивизиядиз рекье туна. Къуллугъдив эгечIна кьве варзни хьанач, Украинада дяведин махсус серенжемдив гатIунна.
— Куь суалриз жаваб яз лугьуз жеда хьи, — рахана Малик Гьажиев, — чи ротадин саки вири офицерар дагъустанвияр я. Командир — Къурбан Камилов. Чи викIегь лейтенант Мегьамед Исмаилов кьве сеферда Россиядин Игитвилин тIвар гуниз къалурна. Ам Мегьарамдхуьряй я. Умудлу я, и гьуьрметлу тIвар адав агакьда. Кьуру тариф туш, чибур пара дирибашбур я. Гьар са женг кичIевал авачиз, душман терг авуналди куьтягьзава. Командованидин патай анжах тарифдиз лайихлу жезва.
Малик Гьажиевни гьахьтин уьтквем командир я. Адаз «Жуьрэтлувиляй», «ВикIегьвиляй» медалар ганва. Махсус серенжемдив гатIунай кьуд вацралай миллетбазри Харьковдин областда чпин гъиляй акъатнавай хуьр азад хъувун патал гьужумна. И женгина Маликал залан хер хьана. Москвада Бурденкодин клиникада сагъламвал гуьнгуьна хтур лейтенант юлдашрин патав хъфена. Алай вахтунда Гьажиева регьбервал гузвай подразделениди полкунихъ галаз оборона хуьзва. Душмандин гьужумар алудзава, миллетбазар ва абурун техника тергзава.
Отпускдиз хтанвай кьегьалди багърийрин, дустарин юкьва ял язава. Вахт куьтягь хьайила ам полкуниз хъфида ва гьар йикъан къайгъуйрив эгечI хъийида. Лейтенантди лагьайвал, чеб герек вири шейэралди, бес кьадарда суьрсетдалди, яракьралди, хъуьтIуьн парталралди таъмин я.
Абад Азадов
