И мукьвара Махачкъалада, гражданвилин оборонадин ва кьетIен гьаларин колледжда, «Za Российскую армию и Росгвардию» лишандик кваз акьалтзавай несилдин руьгь хкажуниз талукьарнавай мярекат кьиле фена. Дагъустандин милли сиясатдин ва динрин крарин рекьяй министерстводин ватанпересвилиз талукьарнавай проектдин сергьятра аваз ам тешкилнавайди “Гъалибвилин волонтёрар” тIвар алай Вирироссиядин общественный гьерекатдин региондин отделение тир.
Мярекатда Росгвардиядин Дагъустан Республикада авай Управленидин, ветеранрин тешкилатрин векилри, колледжра ва мектебра кIелзавай аялри иштиракна.
Винидихъ тIвар кьунвай гьерекатдин чи республикадин отделенидин регьбер Мегьамед Гьуьсейханова, ам ачухдайла, къейд авурвал, Ватан, дидени буба хьиз, гьар са касдихъ авай сад я. “Чи чIехи бубайри Ватан хвена ва ам, чанарилайни гъил къачуналди, душмандикай азадна. Къенин юкъузни чи вилик залан имтигьан акъвазнава. Кьегьал рухвайри — военный рекьяй ва махсус подразделенийрин къуллугъчийри чпин везифаяр намуслудаказ кьилиз акъудзава. Чи везифа абуруз алакьдай куьмекар гун ва далу пад мягькемарун я”, — къейдна ада.
Росгвардиядин Дагъустан Республикада авай Управленидин регьбердин тIварунихъай мярекатдал рахай полициядин полковник Константин Шияна Дагъларин уьлкведин жегьилри алай вахтунда чи уьлкведи кьиле тухузвай военный махсус серенжемда иштиракзавай, чпин буржи намуслудаказ кьилиз акъудзавай ксар руьгьламишиз алахъун шад жедай кар тирди къейд авунихъ галаз сад хьиз, чи ватанэгьлийрин кьегьалвилерикайни суьгьбетна.
Эхирдай республикадин машгьур артистри ватанпересвилиз талукьарнавай манияр тамамарна.
«Лезги газет»
