ЦIийи йисан вилик Дагъустандин Кьил Сергей Меликова республикадин­ призывдин комиссиядин ва РД-дин Оперативный штабдин саналди тир заседание кьиле тухвана. Анал октябрдин вацра эгечIай зулун призывдин нетижайриз килигна.

Республикадин военный комиссардин везифаяр вахтуналди тамамарзавай Абдурагьман Мурадханова къейд авурвал, региондин вилик эцигнавай везифа 100 процентдин кьилиз акъудна. Призывникрин чIехи пай Россиядин Федерациядин Яракьлу Къуватрин кьушунриз рекье туна. Идахъ галаз сад хьиз дагъустанвийри ФСБ-дин сергьятдин ва МЧС-дин кьушунрани къуллугъда.

Ноябрдилай инихъ военный транспортдин самолетра аваз жегьилар чпи къуллугъдай чкайрал 10 сеферда агакьарна.

А. Мурадханова  призывдин кIвалах лап хъсандиз тешкилай муниципалитетрин тIварар кьуна. Къалурнавай кьадардилай артух призывникар Махачкъаладин, Къизлярдин, Южно-Сухокумскдин, Дербентдин, Дагъустандин Огнидин, Каз­­бек, Гумбет, СтIал Сулейманан, Кьурагь, Чарода, Мегьарамдхуьруьн районрин военкоматри гьазурна.

Гьа са вахтунда бегьемвилелди учет тухузвачир, яш хьанвай жегьилрив хабар агакьар тийизвай военный комиссариатарни авайдакай лагьана. Ихьтин крариз Тлярата, Буйнакск, Унцукул, БотIлих, Къаякент ва Леваши районра рехъ гана.

Гьялзавай месэладиз баянар гуналди, Сергей Меликова 2025-йисан  гатфарин призывдин кампаниядив 15-январдиз эгечIунин гьакъиндай тапшуругъ гана.

«Агьалияр военный къуллугъдал желб авуниз талукь тешкиллувилин кье­тIен къайда ава. И важиблу кIвалах Президентдин Указ акъудай йикъалай ваъ, са тIимил фад башламишна кIанда. И кар гьар са хуьруьн призывникдин яшда авайбур учетдиз къачуниз, жегьилар ва абурун диде-бубаяр хабардар авунизни талукь я.

И карда кьилин роль муниципальный тешкилатрин регьберри къугъвазва­. ГьикI лагьайтIа, абур чпин мулкара призывдин комиссийрин председателар я. Абурухъ галаз сад хьиз, жегьилар ар­мия­диз желб авунин кардал маса тешкилатарни, гьа гьисабдай яз жегьилрин, жемиятдин тешкилатар машгъул хьун герек я», — лагьана Сергей Меликова.

Региондин Кьили муниципалитетрин регьберрал цIийи йисуз, хуьрерин администрацийрин кьилериз, агъсакъалриз ва динэгьлийриз теклифна, призывдин комиссийрин ачух заседанияр тухун тапшурмишна.

«Четинвилер хьана ва гилани ава. Ам­ма Дагъустанди вичин вилик эцигнавай­ везифа кьилиз акъудна. И месэладив жавабдарвилелди эгечIай республика­дин во­енный комиссариатдин кьиле авайбу­руз, гьакI и кIвалах хъсандиз тешкилай шегьеррин, районрин военкомат­риз­­­ сагърай­ лугьуз кIанзава. Виринра и кIва­лах хъсандиз кьиле фин патал адав вахтунда­ эгечIна кIанда», — лагьана  региондин Кьили.

РикIел хкиз кIанзава хьи, армиядиз къуллугъиз эверзавай жегьилри дяведин махсус серенжемда иштиракдач. Гьа са вахтунда республикада Россиядин Яракьлу Къуватра икьрардин бинедаллаз къуллугъ ийиз кIанзавайбурун кIвалахни эхирдиз къвезва.

РД-дин Хатасузвилин советдин сек­ре­тарь Мегьамед Баачилова къейд авурвал, гьукум идара ийидай органрин ва маса идарайрин къуллугъчийрини РФ-дин оборонадин министерстводихъ галаз армияда къуллугъ авунин гьакъиндай икьрарар кутIунзава.

ИкI, РД-дин образованидин ва илимдин, зегьметдин ва яшайишдин, рекъем­рин рекьяй вилик финин, финансрин, энергетикадин ва тарифрин, милли сия­сатдин ва динрин крарин, министерст­войрихъ, карчивилин ва инвестицийрин, культурадин ирс хуьнин, информациядин ва печатдин рекьяй агентствойрихъ, Новолак район куьчарунин управленидихъ, балугърин майишатдин ва ци­п­ицIрин рекьяй комитетрихъ хъсан нетижаяр хьана.

Хуьрерин военный учетдин столрин кIвалах хъсанарун  ва абуру военный комиссариатрихъ, районрин администрацийрихъ галаз алакъаяр мягькемарун патал мулкарин округра гьар кварталдиз семинарар, совещанияр тухудайвал я.

Икьрардин бинедаллаз агьалияр армиядиз желбдай пунктунин начальник Мегьамедшамил Салаватова лагьайвал, и ре­кьяй хъсан нетижаяр Махачкъаладин, Каспийскдин, Буйнакскдин, Избер­башдин, Къаякентдин, Къарабудахкентдин, Къулидин, Табасарандин военный комиссариат­ри­­ къалурна. Бабаюрт, Унцукул, Шамил, Тля­рата районрин военкоматар гуьгъуьна­ ама.

Январдиз рабочий дестедин за­седа­ние кьиле фида, анал призывдин кампания тешкилуниз ва агьалияр икьрардин бинедаллаз армияда къуллугъ авунал желб авуниз талукь месэлаяр гьялда.

Хийир  Эмиров