«Йисан нетижаяр» лишандик кваз Россиядин Президент Владимир Путина тухвай ачух линиядиз 2,5 млн суалар, теклифар, тIалабунар атанвай. Гьелбетда, дяведин махсус серенжемдиз, ана иштиракзавайбурун яшайишдиз, набутриз гузвай кьезилвилериз талукь суаларни тIимил тушир. Абуруз Президентди тамам жавабарни гана.
Уьлкведин Президент госпиталра, реабилитациядин центрайра сагъар хъийизвай аскеррихъ галаз гуьруьшмиш хьайила, абуру са кьадар теклифар, меслятар ганай. И кардикай В. Путина ачух эфирда лагьана.
«РФ-дин оборонадин министерстводиз, «Ватан хуьзвайбур» фондунизни кхьена, аскерри набутриз пулар гузвай къайдада дегишвилер тунин гьакъиндай тIалабнай. Чнани лап залан хирер хьайибуруз 4 млн манат гудай къарар кьабулна. Виликдай хьанвай хирерин заланвилиз, кьезилвилиз килиг тавуна, 3 млн манат гузвай. Зи бейнидиз фикир атана: 3 млн манат къачурбурув государстводи гузвай 1 млн манат агакьнач эхир. За лагьана: ваъ, икI жедач, виридаз къвезвай кьадар пул гана кIанда. Гила набут хьанвай вири аскеррив алава са миллион манат агакьзава».
Кьезил хирер хьайибуруз закондин бинедаллаз 1 млн манат гузва.
Ачух линияда Президентдиз аскеррин уьмуьрдин юлдашри Курскдин областдин хуьрер миллетбазрикай азадзавай аскерриз ва гуьгьуьллубуруз талукь суаларни гана. Абурун гьакъиндайни Владимир Путина вичин фикир лагьана.
«Виликдай женгера садрани иштирак тавур, дяве кьиле физвай сенгеррал тахьай ксар садлагьана Курскдин областдиз акъатна, амма абурув СВО-дин иштиракчийриз талукь яз гузвай пулар агакьзавачир. ГьикI лагьайтIа, абур терроризмдиз акси яз тухузвай серенжемдин иштиракчияр яз гьисабзавай. Вирида талукь пулар къачуда, за и кар ахтармишда. Военный ведомстводи и месэладиз са артух фикир ганач, им абурун дуьм-дуьз везифа ятIани. Вири крар туькIуьр хъийида, Ватандин вилик буржи тамамарзавай гьар са аскердив военныйриз талукь тир вири агакьда. ГьакIни ВСУ-ди ишлемишзавай РагъакIидай патан техника терг ийизвайбуруни чпиз талукь пулар къачуда».
Владимир Путина есирда гьатнавай ва гел галачиз квахьнавай аскеррин хизанриз гана кIанзавай пулариз талукь къарар, гежел тевгьена, акъудунин тапшуругъ гана. Ада гьакIни военныйриз женгерин, командировкайрин, гьужумрин гьерекатра иштиракунин ва оборона тешкилунин пуларни гузвайди рикIел хкана.
Алава хъувун герек я хьи, РФ-дин Гьукуматдин Председатель Михаил Мишустина ноябрдиз къул чIугур къарардин бинедаллаз махсус серенжемдин жегьил иштиракчийрин хизанриз сифте нубатда кIвалер маса къачудай ва я эцигдай яшайишдин пулар гузва. Ихьтин пулар 35 йис тамам тахьанвай гъуьлни паб авай хизанри, аялар авачиз хьайитIани, къачуда. Анжах кьилин шартI ава — хизан яшайишдин кIвалерихъ игьтияж авайди хьун лазим я.
Абад Азадов
