ЦIийи йисан вилик республикадин премьер-министр Абдулмуслим Абдулмуслимова 30-далай виниз дагъустанвийрив РД-дин Гьукуматдин шабагьар вахкана.
«Лезги газетдиз» Дагъустандин Гьукуматдин пресс-къуллугъди хабар гайивал, абурун арада рекъемрин, хуьруьн майишатдин, медениятдин хилерин, къанун-къайда хуьдай ва гьукумдин органрин векилар авай.
Шабагьар вахкудайла, А.Абдулмуслимова виридаз Сергей Меликован патай ЦIийи йис мубаракна ва абуру республика вилик тухунин кардик еке пай кутазвайди къейдна.
«Сергей Алимович Меликован регьбервилик кваз чна вирида санал чи хайи республика мадни авадан хьун патал гьакъисагъвилелди зегьмет чIугвазва. Чи вилик гзаф месэлаяр ква, абур гьялунилай Дагъустандин пакадин югъ аслу тирди чаз виридаз чизва. И рекье чун сад хьана кIанда. Намуслу зегьметдай заз мад сеферда квез сагърай лугьуз кIанзава», — алава хъувуна премьер-министрди.
«ЛГ»
