Алатай гьафтеда “Дагъустан” РИА-да республикадин СМИ-рин векилар Россиядин посол Азим Ярагьмедовахъ галаз гуьруьшмиш хьана. Ада вичин къуллугъдикай ва посолдин везифаяр кьилиз акъудай уьлкведикай итижлу суьгьбет авуна.
— Эритрея гъвечIи уьлкве я, — лагьана Азим Алаудиновича. — Адан халкьди 3,8 млн кас тешкилзава. Абурукай мусурманар-суннитар — 50, хашпараяр — 30, католикар — 13, протестантар — 5 ва маса динриз къуллугъзавайбурни 2 процент я. Уьлкведин меркез Асмэра шегьер гьуьлуьвай 2350 метрдин кьакьанда дуьзен чкадал ала. Ана 712 агъзур агьали яшамиш жезва. Мадни чIехи шегьеррик Кэрэн, Мэндэфэра, Барэнту ва портар Асэб, Массауа акатзава.
Эритрея Африкадин виридалайни жегьил государство я. Шаз ада вичин 28 йис къейдна. Ам яваш-яваш кIвачел акьалтзава. Экономика вилик тухун патал еке кIвалах тухвана кIанзава. Россияди и уьлкведиз са бязи хилерай куьмек гузва. Алай вахтунда Эритреядин вишелай виниз жегьилри Россиядин вузра кIелзава. Россиядихъ галаз алишверишдин, экономикадин алакъаяр гегьеншарзава. Уьлкведин инсанар ачухбур, дуствал теклифдайбур, пехилвал течидайбур я. Абур масадаз куьмекизни фида.
Россиядин посол яз, Квелай алакьай менфятлу, хъсан крар гьибур я лагьай суалдиз ада икI жаваб гана:
— Дипломатвилин везифа хивез къачунвай ксарин кIвалах тоннралди, метрийралди алцумиз жезвайди туш. Ада жуван Ватандин итижар хуьн патал гьар йикъан четин ва важиблу кIвалах кьилиз акъудзава. Гьелбетда, посолдин кIвалахдин менфятлувал къалурзавай нетижаярни ава. Имни, сифте нубатда, жуван государстводин къецепатан сиясат агалкьунралди тухудай, адан аслу туширвал, милли итижар, хатасузвал, мулкарин тамамвал, чара уьлкведиз акъатай ватандашрин ихтиярар, азадвилер хуьдай международный праводин ва дипломатиядин такьатралди таъминарун я. Идалди чна чун авай уьлкведихъ галаз кьве государство патални хийирлу, менфятлу, амадагвилин алакъаяр арадал гъуниз куьмекзава. Къе завай инанмишвилелди лугьуз жеда хьи, Россиядинни Эритреядин арада дуствилин алакъаяр ава, абур йисалай-суз гегьеншни жезва.
— Дагъустандиз Куь къуллугъдикай хийир авани?
— Эгер чи зурба уьлкведиз аватIа, Дагъустандизни ава. Яргъаз акъатнаватIани, за хайи республикада кьиле физвай гьалариз дикъет гузва. Исятда Сергей Меликова кьиле тухузвай кIвалахди гзаф инсанар, гьа гьисабдай яз зунни, шадарзава. Ада са гьихьтин ятIани къефлеяр, тухумар патал ваъ, Дагъларин уьлкведин вири халкьар патал зегьмет чIугвазва. Зунни республикадиз жувалай алакьдай гьихьтин хьайитIани куьмек гуз гьазур я.
Эхирдай малум хьайивал, чи ватанэгьлиди Зимбабведа РФ-дин посолвиле къуллугъда.
Нариман Ибрагьимов
