Хуш къилихни гуьзел къамат…
Инал гъанвай келимаяр Кьуьчхуьрви Фазила вичиз тарс гайи муаллимдикай кхьенва. Амма чна гьиссзава: ихьтин лишанар муаллимдивай тарс къачур ученикдизни хас я.
Фазила гзаф йисара инсандин къилих векъи жедай къурулушра зегьмет чIугуна. Ихтилат силисдик квайбур вахтуналди хуьзвай идарадикай — Махачкъаладин 1-нумрадин СИЗО-дикай физва. Фазил Жумалиевича ана 2000-йисалай инихъ та пенсиядиз экъечIдалди къуллугъна. Подполковникдин чиндив агакьна. Гилани ада гьа идарадин ветеранрин советдин председателвилин везифаяр тамамарзава.
Къанун-къайда хуьдай органра вичин жегьил йисар акъуднавай касдихъ шаирвилин гьисс, бажарагъ хьуни, вичини асул гьисабдай зарафатни хъуьруьн кваз кхьини чи фикир артух желбзава, къилихни адан гьа карди хуьзва…
Инал вич-вичелай рикIел ам хайи хуьр — ватан, адав шаирвилин гьиссер-цIирер агакьарай муаллимар, хуьруьн чIехи тарих къвезва. Кьуьчхуьр — чIехи классик, вичел “бунтчи шаир” тIвар акьалтай Саидан ватан тушни бес! И хуьруь са шумуд несилда генани бажарагълу шаирар, манидарар, арифдарар гайидини рикIел къвезва. Айдунбег Камилов, Улушан Муталибов, Алимет Алиметов, Абдурагьман Ляметов, Зара Латифова, Зара Фейзуллаева ва масабур гьа жергедай я.
Фазилав агакьнавайди, сифте нубатда, гьабурун ирс, тежриба я. Гьа са вахтунда уьмуьрдайни кIуь-цуруди дадмишайди, вичин ивидик дериндай кужумайди адан шииррай чир жезва. За саки 10 йис идалай вилик, сифте яз шаирдин чIалар “Лезги газетдин” чинал гъидайла, кхьенай: “Сирлу кар туш. Чи дагълара чпин гьайбатдикай гьелелиг ван тахьанвай, инсанри тариф тавунвай акьван булахар ава хьи! Зи фикирдалди, Фазилни гьахьтин, гьеле ахтармиш тавунвай булах хьиз я..”
Нубатдин сеферда куь вилик цIийи эсерар гъидайла, а гафар за генани тикрарнава. И кар кутугнава, гьикI хьи, цIийи шиирра Фазил цIийи терефрихъай (юмординни сатирадин, айгьамринни насигьатрин) ачух жезва.
Лирикадинни муьгьуьббатдин, гражданвилинни тIебиатдал гьейранвал авунин эсеррихъ галаз сатирани, юморни, философиядин веревирдерни хьуни шаир санал акъваз тавунвайдан гьакъиндай шагьидвалзава. Чна и кар тебрикни ийизва.
Ф.Асланов 1961-йисан 15-сентябрдиз Кьурагь райондин Кьуьчхуьррин хуьре дидедиз хьана. Кьурагьа юкьван школа, 1984-йисуз ДГТУ акьалтIарна, инженервилинни технологвилин пешеяр чирна, ада чи са хейлин заводра зегьмет чIугуна, армиядин жергейра къуллугъна. Хтана, мад вичин пешедай кIвалахун давамарна.
2000-йисалай ада вичин вири къуватар ва мумкинвилер къанун-къайда хуьдай органрихъ галаз алакъалу авуна.
И йикъара шаирди — подполковникди вичин 60 йис тамам хьун къейдзава.
Мерд Али
