Дагъустандин зегьметдин ва яшайишдин рекьяй вилик финин министерстводин пресс-къуллугъди хабар гузвайвал, тIимил къазанжияр къвезвай хизанриз куьмекар гунин сергьятра аваз, 1-классдиз физвай аялар авай хизанриз са сеферда 2229 манат (гьар са аялдиз) пул гузва.
Алай йисуз 600 агъзурдалай гзаф такьатар 300 хизандиз ганва. И кIвалах йисан эхирдалди давам жеда.
Министерстводин пресс-къуллугъдин векилди алава хъувурвал, и пул анжах гзаф аялар авай ва тIимил къазанжияр къвезвай хизанриз талукь я. Ам къачун патал диде-бубайри алай йисан 1-декабрдалди чеб яшамиш жезвай чкада авай яшайишдин центрадиз арза вугана кIанда.
Арзадихъ галаз вугана кIанзавай мад са шумуд документ ава: аял 1-классдиз фенвайди тестикьарзавай справка, диде-бубадин паспортар, аял хайивилин гьакъиндай шагьадатнама, диде-бубадин СНИЛС, эвленмиш хьунин гьакъиндай шагьадатнама, хизандиз талукь справка, бейкарар тирди тестикьарзавай ва кIвалахзавайбуруз зегьметдин гьакъидиз талукь справка, банкдин счетдин реквизитар.
«Лезги газет»
