Мегьамеднаби Ибрагьимов 1913- йисуз Мегьарамдхуьруьн райондин Ярагърин хуьре дидедиз хьана. 1931-йисуз ада Дербентдин педтехникум акьалтIарна. 1941-йисуз ам Ватан хуьз фена. М. Ибрагьимова СССР-дин РагъэкъечIдай патан часпарар хуьн патални женгера иштиракна.
Сифтедилай эхирдалди женгера хьайи М. Ибрагьимов гзаф медалринни грамотайрин сагьиб хьана.
1946-йисуз Мегьамеднаби хайи хуьруьз хтана, чкадин школада аялриз дерин чирвилер, ватанпересвилин тербия гуз, муаллим яз 1973-йисалди кIвалахна. Зегьметдин фронтда ам «За трудовое отличие» медалдиз лайихлу хьана.
Паша Казимович Мамедов 1913- йисуз Куьре округдин Кьурагьрин хуьре дидедиз хьана. 1930-йисуз ада Дербентдин педтехникум акьалтIарна ва Агъул районда муаллим яз кIвалахна.
1940-йисуз П.Мамедов армиядиз тухвана. Ада Ленинграддин танкистар гьазурдай училищеда кIелна. 1941-йисан 22-июндиз Гитлеран фашистри хабарсуз чи Ватандал вегьейла, танкист душмандин хура акъвазна.
1941-йисан октябрдиз фашистрихъ галаз кьиле фейи женгина хирер хьайи ам госпиталдиз аватна.
Душмандин 4 танк терг авур викIегь кьурагьвидиз «Яру Гъед» орден гана. Фашистар, душмандин дяведин техника терг ийиз-ийиз Советрин аскерри Европадин уьлквеярни фашистрикай азадна.
1945-йисан апрелдин эхирра Берлиндин куьчейра женгер тухудайла, Паша Мамедовал вичин хуьруьнви (кьурагьви) Рамазан Шерифовни гьалтна. Абурун шадвилихъ и кьил, а кьил авачир.
ВикIегьвилелди Гитлеран магъара къачур кьурагьвийрини виридахъ галаз 9-Май, Гъалибвилин югъ Берлинда къейдна.
Женгера къалурай гьунаррай Паша Казимович орденриз, медалриз ва грамотайриз лайихлу хьана.
Юсуф Рамазанович Алимагьамедов 1918-йисуз Куьре округдин (Хив район) Хорежрин хуьре лежбердин хизанда дидедиз хьана. 1935-йисуз ада Дербент шегьерда педтехникум куьтягьна ва Лакарин хуьруьн сифтегьан школада, 1939-1940-йисара хайи хуьруьн Ворошилован тIварунихъ галай колхоздин председателвиле кIвалахна. 1941-йисан 21-октябрдиз ам Хив райондин РВК-дай Яру Армиядин жергейриз фена. Ада сифтедай 315-нумрадин полкуна стрелок яз, гуьгъуьнлай 416 нумрадин стрелокрин дивизияда стрелокрин отделенидин командир яз къуллугъна.
Дяве башламиш хьайи сифте йикъарилай Ю. Алимегьамедова 416-стрелокрин дивизияда взводдин командир тир. Ада Кавказ, Поволжье патал кьиле фейи женгера вишералди душманар тергна.
Ростов патал женгера адал залан хирер хьана, 1943-йисан августдилай ноябрдалди ам Ростовда госпиталда къаткана. Хирер сагъар хъувурла, кьегьал дагъви мад душмандин хура акъвазна. Одесса шегьер азаддай вахтунда адан кьилихъ ракьун хъипрепIар галукьна, контузия хьана, армиядай хайи ватандиз рекье хтуна.
Дяведа къалурай гьунаррай адаз «Ватандин дяведин» орден, «ВикIегьвиляй», «Женгера тафаватлу хьунай», «Германидин винел гъалиб хьунай» ва юбилейрин медалар, грамотаяр гана.
Рамазан Велибегов, тарихчи
