Къайдайрал амал ийин
Дагъустандин энергетикри цIинин гатуз гзаф чими жедайди фикирда кьуналди, агьалийриз электроприборар ишлемишунин къайдайрал амал авуниз эвер гузва. «Дагъустан» РИА-ди хабар гузвайвал, «Россети Северный Кавказ» — «Дагэнерго» карханади дагъустанвийрин рикIел электротадаракар ишлемишунин къайдайрал амал авун кар алай месэлайрикай сад тирди хкана.
«Россети Северный Кавказ» — «Дагэнерго» карханадин филиалдин директордин везифаяр вахтуналди тамамарзавай М. Шапиеван гафаралди, гад чимиди хьун вилив хуьзва. Гьавиляй са шумуд электротакьат санал электросетдик кутун тавун хъсан я. ГьикI хьи, и карди электросетрал акьалтзавай гуж артухарун мумкин я.
Чешмеди кхьизвайвал, пешекарри са розеткадик электричестводин са шумуд алат кутун тавун, ишлемишзавай алатрин ери ахтармишун ва жува-жуваз туькIуьрнавай ва я сертифицировать тавунвай тадаракар ишлемиш тавун меслят къалурзава.
Къейдзавайвал, ишлемиш тийизвай приборар хкудун ва симериз хасаратвал хьанвани, хьанвачни чирун патал вахт-вахтунда гуьзчивалун важиблу я. Электросетдин къурулуш ремонт авунин кIвалах лагьайтIа, и рекьяй пешекаррал ихтибарна кIанда.
КIват хъийизва
Дагъустанда хутарин бегьер кIватI хъийиз эгечIнава. Идакай РД-дин хуьруьн майишатдин ва недай суьрсетдин министрдин сад лагьай заместитель Шарип Шарипован телеграм-каналди хабар гузва.
Чешмеди раижзавайвал, бегьер кIватI хъийиз сифте Мегьарамдхуьруьн районда башламишна. И емишар гьасилунал гьалтайла, ам кIвенкIвечи чкадал ала. Виликамаз кьунвай гьисабралди, цIи Дагъустанда саки 30 агъзур тонн хутар кIватI хъийида, идан пудай са пай — Мегьарамдхуьруьн районда», — кхьизва Ш. Шарипован телеграм-каналда.
Хутар гьасилунал машгъулбурун гафаралди, алай йисуз и жуьредин емишриз хъсан къиметар тайин жезва, и делилди гележегда хутарин цIийи багълар кутунин кар артухарунал гьевесламишда.
Хабар гузвайвал, 2020-2025-йисара Дагъустанда хутарин багъларин мулкарин кьадар 310 гектардив агакьнава. Шаз Дагъустанда 93 агъзур тонн къене цил авай емишар кIватI хъувунва.
ЦицIериз акси яз
Дагъустанда хуьруьн майишатдин 24 агъзур гектардилай гзаф чилера цицIериз акси серенжемар кьиле тухванва.
Республикада, санлай къачурла, 107 агъзур гектардилай гзаф майданар ахтармишнава, 43 агъзур гектарда зиянкарар авайди тайин хьанва. 2025-йис патал виликамаз кьунвай гьисабралди, химиядин затIаралди гьялунин (химобработки) серенжемар 53 агъзур гектардилай виниз майданра кьиле тухуда.
ЦIи цицIерин жуьрейрин гьашаратрихъ (саранчовые) галаз женг чIугуниз талукь серенжемар вахтундамаз кьиле тухванва.
ЦIийи 10 автобус
Махачкъала-Каспийск маршрут патал цIийи 10 автобус маса къачуда. Идакай «Дагъустандин экономика» телеграм-каналди хабар гузва. Госзакупкайрин сайтдиз республикадиз цIийи 10 автобус агакьардай компания хкягъун патал аукцион кьиле тухуниз талукь малуматарни акъатнава.
Техдокументдал асаслу яз, 153 миллион манатдихъ Ситимакс-9 маркадин ва я адаз ухшар автобусар маса къачудайвал я.
Чешмеди ихьтин делиларни гъанва:
— автобусда 70 касдилай тIимил тушиз агьалияр гьакьда;
— полар агъада авайбур ва сагъламвал сергьятламиш инсанар патал кутугайбур я;
— абура кондиционеррин къурулуш кардик жеда.
Автобусар маса къачуниз акъатдай харжияр региондин бюджетдик кутунва. И улакьар къачунин къарар умуми транспорт цIийи авунин федеральный программадин сергьятра аваз кьабулнава.
Пландик кутунва
Дагъустандин аграрийри 2025-йисуз саки 4,5 агъзур гектар хуьруьн майишатдин чилер кардик кутун фикирда кьунва.
ЦIи Дагъустанда, санлай къачурла, саки 4,5 агъзур гектардин мулкар гьялунин, абур авай гьал хъсанарунин кIвалахриз талукь 33 проект уьмуьрдиз кечирмишун пландик кутунва.
Идалайни алава яз, мелиорациядин проектар хкядай 2026-йисан конкурсдиз Дагъустанди 5 агъзур гектардилай гзаф мулкар гьялун патал 38 проект къалурнава.
Гьазурайди — Муса Агьмедов
