Важиблу буржи
Ватан хуьн ва адаз намуслувилелди къуллугъ авун — им гьар са веледдин виридалайни важиблу буржи я. Ватанпересвал — им хайи уьлкведихъ авай кIанивал, вафалувал къалурун, адан итижар патал къуллугъун ва, герек атайтIа, чанни къурбанд ийиз гьазур хьун я. И важиблу буржидиз вафалу рухваяр, рушар чи уьлкведа, гьа гьисабдай яз Дагъустандани гзаф хьана ва гилани ава.
И кар абуру тарихдин гьар са девирда, Ватан кIеве гьатайла, хайи кIвал, къул, чил чапхунчийрикай хуьдай гьар сеферда успатна. Иллаки — Ватандин ЧIехи дяведин йисара. Миллионралди агьалияр къирмишай, инсаниятдиз еке зиянар гайи ахьтин дяве мад хьайиди тушир. Чи уьлкведин рухвайрини рушари лап къизгъин женгерани, фашистрин кьушунри чукIурай, кайи, барбатIай хуьрер, шегьерар, карханаяр, майишатар кIвачел ахкьалдардайлани, пятилеткайрин планар кьилиз акъуддайлани, интернационалиствилин буржи тамамардайлани, 1999-йисуз Дагъларин уьлкведал яракьламиш хьанвай бандитрин дестейри вегьейлани, Ватандихъ авай кIанивал къалурна ва вилик акъвазнавай везифаяр уьтквемвилелди кьилиз акъудна.
Алай вахтундани чи ватанэгьлийри Россиядин армиядин жергейрани, ислягь ва гьунарлу зегьметдани Ватандиз вафалувал къалурзава. Куьрелди лагьайтIа, ватанпересвал дагъустанвийрин ивидик квай ери я. Дагъустандин чилелай чи уьлкве фашистрин чапхунчийрикай хуьз фейибурукай 58 кьегьал Советрин Союздин Игит лагьай тIварцIиз лайихлу хьана. Алай вахтунда Россиядин Игитвилин тIварцIиз лайих хьанвайбурун кьадарни къанни цIудалай алатнава. Им дамахдай кар я.
Чи уьлкведин ва гьакI дуьньядин майданда ислягьвал хуьн, дяведик цIай кутаз кIанзавайбуруз, дявекарриз дуьзгуьн жаваб гун патал лазим кьадарда алай аямдин техникани герек жезва. Къенин юкъуз Россиядин армиядин вири кьушунар бес кьадарда алай аямдин вири жуьредин яракьралди, техникадалди ва виниз тир чирвилер, алакьунар авай пешекарралди, офицерралди таъмин я.
Эгер кьилди-кьилди къачуртIа, къе армиядин кар алай хел яз гьисабзавай Гьавадинни космический къуватар лазим кьадарда самолетралди, вертолетралди, пешекарралди таъминарнава. Эхиримжи йисара уьлкведин Президентди, гьукуматди Яракьлу Къуватрин хилез, оборонадин месэлайриз еке фикир гузва. Россиядин аскерар, офицерар патал къулай шартIар тешкилзава, абур яшайишдин кIвалералди таъминарзава. Ихьтин сиясатди хъсан нетижаярни арадал гъизва. Россиядин аскердин авторитет хкаж хъхьанва. Ватанпересвилин руьгь квай кьушунри лап муракаб месэлаяр гьялзава.
Военный гьавадин флот арадал гъайи сифте йисар рикIел хкайтIа, ам а чIавуз фанерадикай авунвай поршневой самолетрикай ибарат тир. Къе чи армия сесинилайни йигиндиз лув гудай, чпелай лап муракаб крар алакьдай ва яргъал мензилриз фидай самолетралди таъмин я. Абур гьалзавай Россиядин летчикри чпин алакьунар Кореядин, Вьетнамдин, Египетдин, Афгъанистандин, Сириядин ва Европадин са бязи уьлквейрин бушлухрани къалурна.
Лап и йикъара журналистрин суалриз жавабар гудайла, Владимир Путина яракьриз талукь рахунарни авуна. Ада къейдна хьи, Россияди, санкцийриз ва маса къадагъайризни килиг тавуна, виликди камар къачудайла, РагъакIидай пад чархара мадни лашар тваз, сергьятрив НАТО-дин кьушунар гъиз алахъзава. Чахъ абуруз жаваб гудай вири такьатар ава,- лагьана Президентди.
Эхь, гьакI я. Къейд авун лазим я хьи, Россиядин яракьлу къуватра дагъустанвийри, гьа гьисабдай яз лезги халкьдин векилрини, уьтквемдиз къуллугъзава. Идан гьакъиндай чи аскерри къуллугъзавай частарин командиррилай диде-бубайриз, военкоматриз хквезвай чарарини шагьидавалзава.
Чна къе виридаз Ватан хуьзвайбурун югъ мубаракзава. Дуьньяда ислягьвал, Ватандин къаравулда акъвазнавай гьар садахъ мягькем сагъламвал, агалкьунар хьун чи мурад я.
Хийир Эмиров
