Чи баркаллу жегьилар
Сулейман-Стальский райондай акъатай алимрин, шаиррин, генералрин, хъсан пешекаррин кар-кIвалах давамарзавай жегьилрин кьадар чи йикъарани тIимил туш. Алай вахтунда чи гзаф жегьилри Москвада, Санкт-Петербургда ва чIехи маса шегьеррин кесерлу университетра, академийра кIелзава, жуьреба-жуьре хилерай пешекарвилер къачузва. Абурукай яз, чавай Эминхуьряй тир Сакаржаев Сакаржа Халидовичан тIвар дамахдивди кьаз жеда.
С.Сакаржаева хуьруьн юкьван школа лап хъсан къиметар аваз акьалтIарна, ам гражданский оборонадин, кьетIен гьаларин ва тIебиатдин бедбахтвилер арадай акъудунин министерстводин (МЧС-дин) Москвада авай Академиядик экечIна. Алай вахтунда ада 5-курсуна кIелзава. Хъсандиз кIелунихъ галаз санал ада Академиядин общественный уьмуьрда, гьакIни Вирироссиядин ва Международный илимдинни тежрибадин конференцийра активнидаказ иштиракзава. ИкI, Академиядин проректор В.Г. Полевоян къул алаз ганвай сертификатдай малум жезвайвал, Сакаржаева 2020-йисуз “Предотвращение. Спасение. Помощь” лишандик кваз кьиле тухвай ХХХ илимдинни тежрибадин Международный конференцияда иштиракна.
Чи гъиле Сакаржаеваз РФ-дин МЧС-дин министр Е. Н. Зиничеван къул алаз ганвай чухсагъулдин чар ава. С.Сакаржаев адаз “Къуллугъдин везифаяр намуслудаказ кьилиз акъудунай, виниз тир пешекарвиляй, ЧIехи Гъалибвилин 75 йис тамам хьунихъ галаз алакъалу яз Москвада тухвай Парадда иштиракунай” лайихлу хьана.
Кьегьал рухвайрал чна гьамиша дамахзава.
Фазил Жамалдинов,
Хазран Кьасумов
