Чи ватанэгьлияр — гьар сана

Са шумуд терефдихъай ала­кьу­нар, чирвилер ва тежриба авай ксарал халкьди гьамиша дамахда; чпин мумкинвилериз килигна, ахьтинбуру халкьдиз хийирни гуда. Гъурбатдани халкьдин тIвар хкажиз алакьзавай, милливал хуьзвай, тешкилатчивилин ерияр хас ватанэгьлияр чахъ гзаф ава. Мукьвара зун гьа ихьтин лайихлу векилрикай сад тир  Алимегьамед  Мегьамедович  Магьсубовахъ  галаз таниш хьана. Ам алим, общественный деятель, диндин пешекар, Нижний Новгороддин регионда жемиятдин “Дагъустандин халкьарин милли медениятдин центр” тешкилатдин председатель я. 

А.Магьсубов 1970-йисан 3-декабрдиз Дербент райондин Агълабрин хуьре дидедиз хьана. 1988-йисуз мектеб лап хъсан къиметралди­ куьтягьна. 1987-йисуз адаз СССР-дин ВДНХ-дин гимишдин ме­даль гана. План 200 килограмм яз, ада 600 килограмм помидорар кIватI­най. Адан буба Мегьамед Магьсубовичаз РД-дин лайихлу мелиоратордин тIвар ганай.

1988-1990-йисара А.Магьсубова Яракьлу Къуватрин жергейра  къуллугъ тамамарна. Армиядай хтайдалай кьу­лухъ Агълабрин совхозда фялевална. 1991-йисуз ам Къуръан чирунин рекьяй чирвилер къачуз Стамбулдиз фена. Пуд йисуз ана кIелна. Ана сифте чирви­лер къачуна, ватандиз хтана. 1993-йисуз Махачкъалада имам Шафиидин тIварцIихъ галай исламдин институтдик экечIна. Теологиядин рекьяй  образование къачуна, 1995-йисуз адакай Белиж поселокдин жуьмя мискIиндин имам хьана. 1998-йисуз ам Агълабрин хуьруьн мусурманрин диндин общинадин председателвиле хкяна. Са йисуз ада Агълабрин хуьруьн мектебда араб чIалан муаллимвиле кIвалах­на. Адаз кIуьд чIал чида.

1998-йисуз эвленмиш хьана, хи­занни галаз Нижний Новгород шегьердиз куьч хьана. Гзаф терефрин чирвилер, алакьунар авай жегьил ватанэгьлиди вич къариблухдани викIегь лезги тирди субутна. Ина ам  хсуси карчивилин кIвала­х­д­ив эгечIна: хуьрекрин тIям хъсанардай ва цик квай затIар маса гу­нин­ алишверишдал машгъул хьана.­

Жемиятдин крара вилик-кьилик квай ватанэгьлидихъ тешкилатчивилин рекьяйни кьетIен алакьунар ава. Гьа икI, 2013-йисуз ам Нижний Новгороддин региондин жемиятдин тешкилатдин — Дагъустандин халкьарин милли меде­­ниятдин центрадин — регьбервиле хкяна. Тешкилатдин кIвалах РФ-дин халкьарин арада дуствал мягькемарун, Дагъустандинни­ ­Ни­­же­городский областдин арада ме­дениятдинни жемиятдин ва алишверишдин алакъаяр еримлу авун я.

2019-йисуз ада РФ-дин Президентдин патав гвай халкьдин майи­шатдин ва государстводин къуллугъдин Россиядин академия (РАНХиГС, Президентская академия) куь­тягьна, кьилин образование къачуна.

Агълабрин хуьруьн кьилин куьче Алимегьамедан буба Мегьамедан тIварцIихъ янава. Жумарт ватанэгьлиди хайи хуьр патал алакьдай хъсанвилерни ийизва. ИкI, Агъ­лабрин хуьруьн сурар алай майдан ада элкъуьрна кIевирна, хуьруьз газ тухвана, куьчеяр хъсандиз туь­кIуьрна  ва  къир цана…

Алатай йисара Россиядин аялрин фондунин Нижегородский областдин филиалдихъ галаз санал Дагъустандин халкьарин милли медениятдин центради игьтияж авайбуруз чIехи куьмекар гана. Иллаки начагъ аялриз куьмекар гунин месэладиз фикир гузва.

Региондин сергьятра кьиле тухузвай крарин, мярекатрин кесерлувал адаз ганвай чухсагъулдин чарарини субутзава. Канавинский райондин администрациядин кьили адаз район вилик тухунай, миллетрин арада ислягьвал ва меслятвал мягькемарунай сагърай ла­гьанва. Областдин жегьилриз ватанпересвилин тербия гунин крарик чIехи пай кутунай жемиятдинни гьу­куматдин ва физкультурадинни спортдин “Юность России” кIва­тIал­дин Нижегородский отделенидин председателди Алимегьамед Магьсубоваз чухсагъулдин чар га­на. А.Магьсубован, гьакIни милли центрадин тIварцIихъ разивилин чарар, маса шабагьар гзаф атанва­.

Ада Россиядин халкьарин конгрессра, маса хейлин тешкилатрин, кIватIалрин мярекатра, конференцийра, милли межлисра датIана иштиракзава.

Алай йисуз милли медениятдин центрадиз милли сиясатдин, динрин крарин ва къецепатан ала­къайрин рекьяй РД-дин министр хьайи зурба ватанэгьли, Россиядин государстводин деятель, рагьметлу Загьир Арухов рикIел хкуниз­ талукь мярекат тухудай фикир ава. Дагъустандин халкьдин шаир Р.Гьамзатоваз бахшнавай эдебиятдин мярекатар, шиирар кIелунин ва маниярни кьуьлер тамамарунин межлисарни тешкилзава.

Чи викIегь ватанэгьли кьиле авай тешкилатди тухузвай мярекатрин кьадар инал къейднавай сад-кьведалди сергьятламиш хьанвач. Ам датIана милливал хуьнин, Да­гъустандин халкьарин меденият раижунин, вилик тухунин гьерекатрик ква. Къуй адахъ и рекье мадни агалкьунар хьурай!

К.Ферзалиев