Дербент районда Ватан хуьзвайбурун ва Гъалибвилин 80 йис ачухзавай мярекат шад гьалара кьиле фена.
— Малум тирвал, РФ-дин Президент В. Путина 2025-йис Ватан хуьзвайбурун йис яз малумарнава. ЧIехи Гъалибвал къазанмишна 80 йис тамам жезвай йисуз и къарардихъ кьетIен метлеб ава. Чи игитринни дяведин махсус серенжемдин иштиракчийрин гьуьрметдай, гьакIни тарихда ватан хуьз женг чIугур чи ата-бубайрин игитвилер рикIел хуьниз мажбур я чун. Фашистар дарбадагъ авур, уьлкведин аслу туширвал хвейи бубайриз баркалла!
Ватан хуьзвайбурун йис — им календарда гьакIан са къейд туш, ам чи халкьдин садвилин ва ватанпересвилин лишан я, — лагьана райондин муниципалитетдин кьил М. Рагьимова.
М. Рагьимова, Ватан хуьз, аскервиле къуллугъзавайбурун диде-бубайрив — Абил ва Мина Мамедоврив, Мителим ва Умажамил Гьуьсейноврив, Сиражидин ва Ирада Мегьамедоврив, Самира Жалаловадив, Нежейбат Фаталиевадив рухвайриз ватанпересвилин тербия гунай райондин кьилин патай разивилин чарар, махсус военный серенжемдин иштиракчияр тир Рагьман Гьажиевав, Усман Исмаиловав, Мегьамед Абдулкъадировав Дагъустандин халкьдин вилик кьетIен лайихлувилерай «Къизилдин гъед» медаль ва «Дагъустандин Халкьдин Игит» лагьай тIвар ганвай шабагьар вахкана.
Мярекат концерт гуналди акьалтIна.
Къагьриман Ибрагьимов
