Чи газетдин цIийи йисан вад лагьай нумрада агъсакъал Гьажибуба Рустамован макъала чапнавай, лезги чIал вилик тухунин барадай. Дуьнья акунвай агъсакъалди къарагъарнавай месэла чун, къвезмай несилар патални еке метлеб авайди я. ЧIалан фонд тешкилун регьят кIвалах туш. Амма лезги руьгь квай рухвайри чпин садвал, чIалахъ рикI кузвайди чирайтIа, кар кьилизни акъудиз жеда.
Чахъ лезги чIал вилик тухун патал зегьмет чIугвазвай кьегьалар тIимил авач. Заз чи лезги эдебиятда дерин гелер тунвай Сулейман бубадин тIварунихъ галай райондин кьил Нариман Абдулмуталибоваз теклиф гуз кIанзава: жечни, Нариман стха, вуна и Рустамов Гьажибубади ганвай теклифдин кьил кьуртIа? Чахъ хъсан бизнесменарни ава. Сулейман Керимов, Абасов, Шайдаев ва масабур. Умудлу я, гьабуруни чпин пай кутада. Халкьдиз чпелай алакьдай куьмекар гузвай ксар я. Сагърай чеб.
Лезги чIал, шиират къуватлу ийизвай писателар, гьикаятчияр, шаирар чахъ тIимил авач: Гьаким Къурбан, Ханбиче Хаметова, Сардар Абил, Куьреви Мансур, Мердали Жалилов, Арбен Къардаш, Ася Абасова, лезги газетдин кьилин редактор Мегьамед Ибрагьимов, лезги передача тухузвай Владик Батманов… Виридан тIварар кьаз хьанвач лугьуз, заз багъишламиша. Эгер чун вири сад хьайитIа, чавай а фонд арадал гъиз жеда.
Чаз вилералди аквазва, чи чIал гьикI, гьи жуьреда квахьзаватIа. Пара аялар урус чIалал рахазва. Вучиз лагьайтIа, кIвале диде-буба абурув лезги чIалал рахазвач. Чи чIал квахьуникай фикирзавач, урус чIал гьикI хьайитIани чир жезвайди фикирда кьазвач.
Мукьвара зун дуьзендавай чи ЦIийи Къурушрин хуьруьз мугьман хьанвай. Мукьвадан кIвализ фейила, гъвечIи аялар ана сад-садав урус чIалалди рахазвай. За, ибур Россияда кIвалахзавай хцинбур яни лагьана, хабар кьурла, абур хуьруьн аялар я, чеб-чпив урус чIалалди рахазва лагьана жаваб гана. ИкI хьайила, чIал квахьдачни?…
Чна чIалан къайгъу чIугуна кIанда. ЧIал чир тахьайла, гележегда чи жегьилри, чна хьиз, газетриз, журналриз макъалаяр, шиирар, хкетар кхьин хъийидани? И кIвалахриз чна, агъсакъалри, лезги интеллигенцияди, лезги шииратдал рикI алайбуру фикир гана кIанзава.
Гьуьрметлу лезгияр!
Заз эхирдай лугьуз кIанзава: пара кьадар сагърай лезги иви квай агъсакъал, Ярагъ Мегьамедан тIварунихъ галай мергьяматлувилин фондунин регьбер Гьажибуба Рустамов. Чун вири сад хьайитIа, тикрарзава за мад сеферда, чна гьарда вичелай алакьдай куьмек гайитIа, зун умудлу я, а касди лагьанвай фонд арадал гъиз жеда. Кьудкъанни цIекIуьд кепек хьайила, са кепек кими яз, адакай манат жезвач. Ша чна гьарда вичин са кепек эхцигна, манат арадал гъана, агъсакъалди ганвай теклифдин тереф хуьн!
Шихали Багъиров
