27-октябрдиз 83 йисан яшда аваз лезги шаир, фадлай «Лезги газетдин» редакциядихъ галаз алакъаяр хвейи мухбир Вадим Гьамидович Жамалдинов (Гъетягъ Вадим) рагьметдиз фена.
В.Гь. Жамалдинов 1941-йисуз Азербайжандин Къарадагъ райондин Пута поселокда дидедиз хьана. Адан бубайрин бинеяр СтIал Сулейманан райондин Гъетягърин хуьряй тир. Ана юкьван мектеб акьалтIарайдалай кьулухъ В. Жамалдинова Советрин Армиядин жергейра къуллугъна. Гуьгъуьнлай хуьруьн майишатдин техникум, ДГУ-дин филологиядин факультет акьалтIарна. Жуьреба-жуьре идарайра зегьмет чIугуна, райондин «Куьредин хабарар» газетдин редакцияда мухбир яз кIвалахна.
Гьеле мектебда амаз В. Жамалдинова шиирар, макъалаяр, очеркар кхьизвай. Адан хейлин яратмишунар «Лезги газет», «Куьредин хабарар» газетриз, журналриз акъатна. Ам «Лезги газетдин» редакциядихъ галаз сих алакъаяр хуьзвай авторрикай сад тир. Вичин макъалайра ада зегьметкешрин агалкьунрикай кхьизвай, районда, хуьре гьялна кIанзавай тIал алай месэлаяр къарагъарзавай.
Россиядин писателрин ва журналистрин союзрин, медениятдин «Куьредин ярар» макандин член В. Жамалдинова лезги эдебиятдин суфрадал «Гъетягърин булахар», «Гьижрандин лепе», «Хайи лувар», «Гъетягъар ва гъетягъвияр», «Цуьквер ва къалгъанар» ва 2024-йисуз чапдай акъатай «Хкягъай эсерар» ктабар гъана. Асул гьисабдай ада вичин шиирар дуьньяда авай гьаларикай, инсанрин рафтарвилерикай, тIебиатдикай, уьмуьрдикай, халкьдин месэлайрикай, хайи ерийрикай кхьизвай.
«Лезги газетдин» редакциядин коллективди, Вадим Жамалдинов рагьметдиз финихъ галаз алакъалу яз, адан хизанриз, вири мукьва-кьилийриз башсагълугъвал гузва. Адан экуь къамат чи рикIера амукьда.
