27-октябрдиз 63 йисан яшда аваз Хасавюрт райондин Къурушрин хуьруьн А. Айдунован тIварцIихъ галай 1-нумрадин юкьван мектебдин директор, Россиядин образованидин гьуьрметлу къуллугъчи Ислам Надирович Гьажиметов мектебда денбеден рагьметдиз фена.
И.Н. Гьажиметов 1961-йисуз Къурушрин хуьре инженердин хизанда дидедиз хьана. Хуьруьн 1-нумрадин юкьван мектеб лап хъсан къиметралди куьтягьна, ДГУ-дин къецепатан чIаларин факультетдик экечIна ва 1967-йисуз агалкьунралди куьтягьна. Студент тирла, И. Гьажиметова илимдин кIвалахдиз фикир гузвай, гьавиляй адаз факультетда кIвалахал акъвазун ва аспирантурадиз гьахьун теклифнай. КIвалин яшайишдин шартIар себеб яз, ам Хасавюрт райондиз хтана. Теречное хуьруьн юкьван мектебда, Хасавюрт шегьердин са мектебда муаллимвиле кIвалахна. 2009-йисалай хайи Къурушрин хуьруьн 1-нумрадин юкьван мектебда директордин кIелунрин рекьяй заместителвиле — завучвиле кIвалахна. 2013-йисалай вичин эхиримжи нефесдалди гьа и мектебдин директорвиле зегьмет чIугуна. Ам виридаз дерин чирвилер авай кьилин дережадин муаллим яз чидай. Ислам Надирович сифтени-сифте вичивай, ахпа амайбурувай истемишунардай кас, виридаз чешне тир. Адан шииррални гзаф рикI алай. Муаллимди ватандикай, инсанпересвиликай, муьгьуьббатдикай гзаф шиирар кхьена ва «Сифте гаф» ктабни чапдай акъудна.
И. Гьажиметова зегьмет чIугур коллективра вич еке чирвилер ва алакьунар авай пешекар, хъсан тешкилатчи яз къалурна. Мектебдихъ спортзал амачиз саки къад йис тир. Хуьруьн имам Азим Панагьован куьмекдалди цIийи спортзал эцигиз эгечIай йикъалай ада эцигунрин кIвалахар гуьзчивилик кутунвай ва вичин патай вири куьмекарни гузвай.
Къурушрин хуьруьн администрацияди, 1 ва 2-нумрайрин мектебрин коллективри, профкомдин комитетри, хуьруьн жемятди Ислам Надирович Гьажиметов рагьметдиз финихъ галаз алакъалу яз, адан хизанриз, вири мукьва-кьилийриз, ярар-дустариз, дериндай хажалат чIугунивди, башсагълугъвал гузва. Адан экуь къамат санал кIвалахай юлдашрин рикIерай садрани акъатдач.
«ЛГ»
