21-октябрдиз Дагъустан Республикадин Гьукуматдин Председатель Абдулмуслим Абдулмуслимов Узбекистанда мугьманвиле авайла, УР-дин Олий Межлисдин  Сенатдин председателдин сад лагьай заместитель Содик Сафоевахъ галаз гуьруьшмиш хьана. Идакай «Лезги­ газетдиз» РД-дин Гьукуматдин пресс-къуллугъди хабар гана.

Кьве регьбердин гуьруьш машгьур шаи­р Расул Гьамзатован 100 йисан юбилей къейд авунихъ галаз тешкилнавай мя­ре­кат­­рин сергьятра аваз кьиле фена. Узбекис­тандин патай гуьруьшда УР-дин Олий Межлисдин Сенатдин международный ва къецепатан экономикадин алакъайрин, къецепатан инвестицийрин ва туризмдин рекьяй комитетдин председатель Равшанбег Алимова ва илимдин, образованидин, здравоохраненидин ре­кьяй комитетдин председатель Одилжон Иминова иштиракна. Дагъустандин делегациядик РД-дин Халкьдин Собранидин Председателдин заместитель Камил Давдиев, РД-дин милли сиясатдин ва динрин крарин рекьяй министр Энрик Муслимов, РД-дин Халкьдин Собранидин депутат Марат Алияров ва масабур квай.

Суьгьбетдин вахтунда Ташкентда Расул Гьамзатован йикъар кьиле тухуниз талукь программадикай, кьве республикадин арада парламентрин, туризмдин, промышленностдин, хуьруьн майишатдин ва гьакI маса хилерай амадагвилин алакъаяр вилик тухуникай веревирдер авуна.

Дагъларин уьлкведин делегация УР-дин­ промышленностдин, алишверишдин­, ху­ьруьн майишатдин, культурадин минис­тер­ст­войрин векилрихъ, яратмишзавай ксарихъ ва Узбекистандин мусурманрин управленидин регьберрихъ галазни гуьруьшмиш хьана­.

Гуьруьшдин эхирдай Дагъустандин пре­­мь­ер-министрди Узбекистандин парла­мент­дин векилриз юбилейдихъ галаз акъуд­на­вай Расул Гьамзатован ктабар багъишна.

Къейд авун лазим я хьи, 21-23-октябр­диз Ташкентда «Расул Гьамзатован булахар» тIвар алаз сегьнеламишнавай музыкадинни литературадин тамаша кьиле фена. Дараматда гьакI шаирдин уьмуьрдиз, яратмишунриз талукьарнавай жуьреба-жуьре выставкаярни авай.

*  *  *

РД-дин Гьукуматдин Председатель ­Абдулмуслим Абдулмуслимова ва Узбе­кистандин культурадин министр Озодбег Назарбегова кьве республикадин арада авай культурадинни литературадин алакъаяр вилик тухуникай, акьалтзавай несилдиз диндинни ахлакьдин тербия гунихъ еке метлеб авайдакай, Узбекистанда Расул Гьамзатован 100 йисан юбилей къейд авуниз талукь мярекатрикай суьгьбетна.

Гуьруьшдин иштиракчияр кьве респуб­ликадин арада авай алакъаяр гегьенша­рунин икьрардал атана. Абдулмуслим Абдулмуслимова Озодбег Назарбеговаз Расул Гьам­затован цIийиз чапнавай ктаб ба­гъишна.

Чи мухбир