Кьилел диде-буба алачир, чпин патахъай къайгъу чIугвадай кас авачир етимар яшамиш жедай кIвалералди таъминарунин месэла лап важиблубурукай я. Дагъустанда гьеле кIвалералди таъминариз тахьанвай етимар гзаф ава. Кьилди яз республикадин меркез къачуртIа, ина вишералди аялар кIвалерин игьтияж авайбурук акатзава.
И мукьвара РД-дин Кьил Сергей Меликова етим аялар кIвалералди таъминарунин хиле коррупциядиз рехъ тагунин месэладай РД-дин ришветбазвилихъ галаз женг тухунин крарал машгъул комиссиядин заседание кьиле тухвана. Региондин регьберди етимар кIвалералди таъминарунин рекье бюджетдин такьатар серфунин кардал тухузвай гуьзчивал мягькемарун герек тирди лагьана.
Авайвал лагьайтIа, диде-буба амачир аялриз кIвалер гун патал государстводи чара ийизвай пулунин такьатриз темягькарвал авун – им гафаралди лугьуз тежедай хьтин намуссузвал я. Ихьтин къанунсузвилер арадал татун патал Дагъустандин Кьили районрин, шегьеррин чиновникриз кьетIен тапшуругъар ганва. Кьилди къачуртIа, ада етим аялар кIвалералди таъминарунин рекьяй муниципальный комиссийрин кьиле шегьеррин, районрин кьилер чеб акъвазун герек тирди лагьана. «Республикадин гьукумдин далдадик чуьнуьх хьайиди бес я! Гила чкайрал комиссийрин кьилера муниципалитетрин кьилер чеб акъвазда. Бюджетдин такьатар нетижалудаказ ва макьсаддив кьадайвал ишлемишунин жигьетдай жавабдарвал гьар са регьбердин вичин хиве жеда…», — лагьана С.Меликова.
Алай йисуз и макьсадриз республикадин бюджетдай 779 миллион манат, идалайни гъейри, 189 етим аялриз яшайишдин такьатар яз сертификатралди гудай алава пулар чара авунва. РД-дин образованидинни илимдин министр Я.Бучаеван делилралди, 2020-йисалай къенин йикъалди Дагъустанда диде-буба амачир 1349 аял кIвалералди таъминарнава. ЦIинин 1-августдин делилралди, кIвалер къачун патал нубатда акъвазнавайбурун кьадар 4 агъзурдалай гзаф я.
Къейд авун герек я хьи, етим аялриз кIвалер гунин карда рехъ ганвай нукьсанриз, къанунсузвилериз килигна, РФ-дин СК-дин РД-да авай силисдин управлениди районрин, шегьеррин администрацийрин къуллугъчийриз талукь яз хейлин уголовный делоярни къарагъарнава. Гьа жергедай яз етим аялриз шартIар авачир, ерисуз кIалер гунин, кIвалер гана кIанзавай аялар къанунсуздаказ талукь сиягьдай ахкъудунин, чара авунвай бюджетдин такьатар ишлемишиз тахьунин жигьетдайни. Мисал яз, Махачкъала шегьердин администрациядин къуллугъчийри къанундив, санитариядин къайдайрив кьун тавунвай гзаф квартирайрикай ибарат чкадай яшамиш жедай кIвал гана лугьуз, уголовный дело къарагъарна. Ибур вири намуссузрин темягькарвилихъ, коррупциядихъ галаз алакъалу гьерекатри арадал гъизвай нагьакьан делилар я.
Салим Салимов
